Қазақстанда егіс науқанының мониторингі үшін жасанды интеллект элементтері бар цифрлық платформа енгізіліп жатыр, деп хабарлайды QazMonitor.
Цифрлық технологияларды пайдалану және тұқым сапасын бақылауды күшейту өсімдік шаруашылығының тиімділігін арттырудың негізгі факторларының бірі болмақ. Бұл туралы үкімет отырысында ауыл шаруашылығы вице-министрі Азат Сұлтанов мәлімдеді.
Оның айтуынша, ауыл шаруашылығы министрлігі жасанды интеллект және цифрлық даму министрлігімен бірлесіп егін егу науқанының барысы туралы деректерді жинауға арналған платформаны әзірлеген. Қазір жүйе пилоттық режимде жұмыс істеп тұр.
Вице-министрдің сөзінше, алдағы уақытта өндірістік процестерді талдау және болжау үшін платформаға жасанды интеллект элементтері кезең-кезеңімен енгізіледі. Бұл аграрлық саланы цифрландыру деңгейін арттырып, шешім қабылдау тиімділігін күшейтуге мүмкіндік береді.
Сонымен қатар елде тұқым сапасын қамтамасыз ету жұмыстары жалғасып жатыр. Бүгінде тұқымға деген жалпы қажеттілік 2,3 млн тоннаны құрайды. Тексеру нәтижелері бойынша олардың барлығы егіс стандартының 1 және 2-сыныптарына сәйкес келеді.
Үкімет отырысында минералды тыңайтқыштармен қамтамасыз ету мәселесі де қаралды. Ішкі нарықтағы тыңайтқыш бағасы белгілі бір деңгейде бекітіп қойылғаны айтылды. Бұл көктемгі дала жұмыстары кезінде фермерлерді қажетті ресурстармен тұрақты қамтамасыз етуге бағытталған.
Сондай-ақ Азат Сұлтанов мемлекет басшысының тапсырмасына сәйкес сәуір айынан бастап элеваторларды салу және жаңғырту жобаларын жеңілдікпен қаржыландыруға өтінім қабылдау басталғанын хабарлады.
«Біз осы тапсырманы іске асыру бойынша Жол картасын әзірледік. Онда негізгі қаржыландыру критерийлері мен астық сақтау нысандарын салу және жаңғырту жөніндегі индикаторлар көзделген. Қаржыландыруды толық қамтамасыз ете отырып, элеваторлардың қуатын 1 млн тоннаға дейін кеңейту жоспарланып отыр», — деді вице-министр.