Қазақстанда абоненттік құрылғыларды верификациялау мемлекет бақылауына беріледі. Тиісті заң жобасы ұялы телефондарды тексеруге қатысты мемлекеттік монополияны бекітіп, нарықты заңсыз құрылғылардан «тазарту» шараларын енгізуді көздейді, деп хабарлайды QazMonitor Мәжілістің баспасөз қызметіне сілтеме жасап
Құжатқа сәйкес, верификация функциясын Мемлекеттік радиожиілік қызметінің қарамағына беру ұсынылып отыр. Бұл бастама тұтынушыларға сатып алынатын құрылғылардың түпнұсқалығы мен сапасына кепілдік беруге, қоғамдық және дербес қауіпсіздікті күшейтуге бағытталған.
Сондай-ақ жаңа тетік бизнес үшін адал бәсекелестік пен ашық баға белгілеуге жағдай жасап, мемлекетке кедендік бақылауды күшейтуге және ұялы телефон ұрлығының алдын алуға мүмкіндік береді.
Заң жобасында телефон алаяқтығын анықтау және оның жолын кесу үшін ақпараттық-талдау жұмыстарын күшейту де қарастырылған. Сонымен қатар деректерді өңдеу орталықтарының инфрақұрылымын дамыту және телекоммуникация саласына жаңа технологияларды енгізу жоспарланып отыр.
Бұдан бөлек, халықаралық трафик транзитін орталықтандырылған басқару жүйелерін айналып өтіп ұйымдастыруға тыйым салу ұсынылады. Сондай-ақ рұқсат етілмеген трафикті өткізу мен байланыс желілерін заңсыз пайдалануға қарсы қосымша шектеулер енгізілмек.