Қазақстанда соңғы жылдары мемлекет есебінен дәрі алатын азаматтар саны екі есеге жуық өссе, қаржыландыру көлемі үш еседен астам артқан, деп хабарлайды QazMonitor.
«Бүгінде 3,4 млн қазақстандық тегін дәрі-дәрмекпен қамтамасыз етілуде. 2018 жылы бұл көрсеткіш 1,9 млн адам болған. Ауыр және сирек кездесетін аурулары бар пациенттерге ерекше көңіл бөлінуде. Соңғы жылдары тегін дәрі алатын аурулар тізбесі 48-ден 121 позицияға дейін кеңейтілді», — деді брифинг барысында Денсаулық сақтау вице-министрі Тимур Мұратов.
Ведомство мәліметінше, амбулаториялық дәрі-дәрмекпен қамтамасыз етуге бөлінетін қаржы көлемі 87,2 млрд теңгеден 2026 жылға жоспарланған 337,4 млрд теңгеге дейін ұлғайған.
Денсаулық сақтау министрлігінде Бірыңғай дистрибьютор жұмысына да елеулі өзгерістер енгізілгені айтылды. Байланыс орталығы тәулік бойы жұмыс істеу режиміне көшіріліп, азаматтарға дәрі-дәрмектің бар-жоғы туралы жедел ақпарат алуға мүмкіндік беретін Telegram-бот іске қосылған.
2026 жылдың бірінші тоқсанының қорытындысы бойынша шағымдар саны 18%-ға азайып, 13 мыңнан 11 мың өтінішке дейін төмендеген.
Қоймаларды жалға алуға тәуелділікті азайту үшін Астана, Алматы, Шымкент, Ақтөбе, Ақтау және Семей қалаларында жеке логистикалық орталықтар салу жоспарланып отыр.
Бұдан бөлек, мемлекет отандық фармацевтиканы қолдауды күшейтуде. Қазіргі уақытта 31 қазақстандық өндірушімен 83 ұзақмерзімді келісімшарт жасалған. Сондай-ақ отандық дәрілік заттар мен медициналық бұйымдарды сатып алу көлемі артып келеді.