Шығыс Қазақстан облысы Зайсан ауданында салынып жатқан жаңа әуежай құрылысы аяқталуға жақын деп хабарлайды QazMonitor.
Қазіргі уақытта нысанның 75%-ы дайын. Құрылыс алаңында 300-ден астам адам еңбек етуде, бас мердігер — «ЭЛХОН СТРОЙ» ЖШС.
Жоба аясында әуеайлақтың негізгі инфрақұрылымы — ұшу-қону жолағы, перрон және рульдеу жолы толық салынып бітті. Сондай-ақ аэродром аумағындағы дренаж жүйелері мен инженерлік коммуникациялардың құрылысы аяқталған.
Қазір терминал ғимараты, апаттық-құтқару қызметінің нысаны, гараждар мен жанар-жағармай сақтау қоймаларының құрылысы жүргізіліп жатыр.
Мамандардың мәліметінше, шілде айында жаңа әуежайда сынақ рейсі орындалады. Ұшу-қону жолағының ұзындығы 2200 метрді құрайды, ал аэровокзалдың жалпы аумағы 4000 шаршы метр болады.
Әуежай пайдалануға берілгеннен кейін Қытайдың Үрімші қаласына, Алтай аймағына және Қанас көліне халықаралық рейстер ашу жоспарланған. Сонымен қатар Астана, Алматы және Өскемен бағыттары бойынша ішкі әуе қатынасы жолға қойылады.
Жаңа әуежай өңірлік санаттағы Bombardier Q400 және ATR-72 секілді әуе кемелерін қабылдай алады.