Қазақстан мен Біріккен Араб Әмірліктері жүргізуші куәліктерін өзара тану туралы меморандумға қол қойды. Құжат екі ел азаматтары үшін әкімшілік рәсімдерді жеңілдетіп, жүргізуші куәліктерін пайдалану мен айырбастау тәртібін оңайлатуға мүмкіндік береді, деп хабарлайды QazMonitor
Құжатқа 25 маусымда Қазақстанның Ішкі істер министрі Ержан Саденовтің БАӘ-ге жұмыс сапары аясында қол қойылды. Ол Абу-Дабиде Біріккен Араб Әмірліктері Премьер-министрінің орынбасары әрі Ішкі істер министрі шейх Саиф бен Заид Әл Нахаянмен кездесті.
Келіссөздер барысында тараптар ұйымдасқан трансұлттық қылмысқа, киберқылмысқа және есірткінің заңсыз айналымына қарсы күрес, қылмыскерлерді іздестіру, жедел ақпарат алмасу, заманауи технологияларды енгізу және кадр даярлау мәселелерін талқылады.
Кездесудің басты нәтижесі – Қазақстан Республикасы ішкі істер министрлігі мен Біріккен Араб Әмірліктері Ішкі істер министрлігі арасында жүргізуші куәліктерін өзара тану туралы меморандумға қол қойылуы болды.
Жыл сайын Біріккен Араб Әмірліктеріне шамамен 400 мың қазақстандық барады. Сонымен қатар бұл елде 14 мыңға жуық Қазақстан азаматы тұрақты тұрады. Меморандум ұлттық жүргізуші куәліктерін өзара тануды және құжатта көзделген жағдайларда оларды жеңілдетілген тәртіппен айырбастауды қарастырады. Құжат тараптар қажетті ішкі мемлекеттік рәсімдерді аяқтағаннан кейін күшіне енеді.
Сапар барысында қазақстандық делегация БАӘ-нің Дағдарыстық жағдайлар жөніндегі ұлттық агенттігінің жұмысымен танысты. Сондай-ақ Ержан Саденов EDGE Group технологиялық конгломератының басшылығымен кездесіп, жасанды интеллект, киберқауіпсіздік, арнайы техника мен құқық қорғау органдарына арналған заманауи технологиялық шешімдермен танысты.
ІІМ мәліметінше, қол жеткізілген келісімдер Қазақстан мен Біріккен Араб Әмірліктері арасындағы ынтымақтастықты одан әрі нығайтып, өзара іс-қимылды кеңейтуге ықпал етеді.