Қалдықтарды жинау және қайта өңдеу үдерістерін цифрландыру мақсатында «Жасыл даму» АҚ әзірлеген EcoQolday ақпараттық жүйесі қатысушылар санын арттырып, қайта өңдеу көлемін тұрақты түрде көбейтуде. Жүйе іске қосылғаннан бері оған 159 кәсіпорын өтінім берген, деп хабарлайды QazMonitor.
Олардың ішінде 104-і қалдық жинаушылар, 32-сі қайта өңдеуші кәсіпорындар, 23-і толық циклді кәсіпорындар.
Бүгінде жүйе қатысушыларымен 96 келісімшарт жасалған. Оның ішінде 64 қалдық жинаушымен, 20 қайта өңдеушімен және 12 толық циклді кәсіпорынмен келісімге қол қойылған. Сондай-ақ алдын ала мақұлдаудан өткен төрт кәсіпорын көшпелі тексеруді күтуде, тағы екі өтінім қаралып жатыр.
Жүйе 2024 жылғы тамыз айынан бастап жұмыс істейді. Осы уақыт ішінде EcoQolday арқылы 131,04 мың тонна қалдық қайта өңдеуге жіберілген. Оның басым бөлігі қағаз (92,05 мың тонна) және шыны (28,86 мың тонна) қалдықтарына тиесілі. Сонымен қатар 8,74 мың тонна пайдаланылған шиналар, 1,32 мың тонна пластик және 0,07 мың тонна аралас қалдық өңделген.
Қайта өңдеу көлемі жыл сайын артып келеді: 2024 жылы – 11,07 мың тонна, 2025 жылы – 49,34 мың тонна, ал 2026 жылдың алғашқы жартыжылдығында ғана 70,63 мың тонна қалдық қайта өңдеуге бағытталған.
Бекітілген бюджеттер аясында жүйе қатысушыларына жалпы 3,416 млрд теңге төленді. Оның ішінде 2024 жылы – 4,6 млн теңге, 2025 жылы – 884,4 млн теңге, ал 2026 жылы – 2,527 млрд теңге. Бұл тетік қалдықтарды жинау және қайта өңдеу инфрақұрылымын дамытуға ықпал етуде.
EcoQolday тек бизнес емес, халықтың да белсенді қатысуын қамтамасыз етіп отыр. Жүйеде 1 081 өтінім тіркелген, жалпы 3 540,52 тонна қалдық қайта өңдеуге жіберілген.
Оның ішінде 629 өтінім жеке тұлғалардан түскен, олар 2 276,42 тонна қалдық өткізген. Ал 452 өтінім заңды тұлғалардан түсіп, 1 264,1 тонна қалдық қайта өңдеуге тапсырылған.
«Жасыл даму» АҚ мәліметінше, халық арасында қалдықтарды бөлек жинау мәдениетін дамыту жұмыстары да жалғасып жатыр. «Таза үй – Таза ел» жобасы аясында Астана қаласындағы тұрғын үй кешендеріне қағаз және пластикке арналған арнайы контейнерлер орнатылған.
Сонымен қатар, Ақтау, Ақтөбе, Шымкент және Талдықорған қалаларында ПИК және МИБ өкілдерімен кездесулер өткізіліп, EcoQolday жүйесінің жұмыс қағидаттары түсіндірілуде.
Алдағы уақытта компания жүйені одан әрі кеңейтіп, цифрлық шешімдер арқылы қалдықтарды басқару тиімділігін арттыруды жоспарлап отыр.