Еңбек көші-қоны бағдарламасы бойынша қоныс аударуды жоспарлап жүрген қазақстандықтар енді өз мүмкіндігін онлайн форматта бағалай алады. Бұл үшін migration.enbek.kz порталында арнайы жаңа сервис іске қосылды, деп хабарлайды QazMonitor ҚР Еңбек және халықты әлеуметтік қорғау министрлігінің баспасөз қызметіне сілтеме жасап.
Жаңа цифрлық сервис азаматтарға қоныс аударуға қабылдайтын өңірлердің шарттарымен танысып, ресми жұмысқа орналасуға мүмкіндік беретін сұранысқа ие мамандықтардың өзекті тізімін көруге мүмкіндік береді.
Пайдаланушылар өздерін қызықтырған өңірді таңдап, сол аймақтағы бос жұмыс орындары, мемлекеттік қолдау шаралары, тұрғын үй жағдайы және бағдарламаға қатысушыларға ұсынылатын басқа да мүмкіндіктер туралы ақпаратты бірден ала алады.
Порталда сұранысқа ие мамандықтар тізіміне ерекше назар аударылған. Бұл жұмыс іздеушілерге көшпей тұрып-ақ еңбек нарығындағы мүмкіндіктерін бағалауға көмектеседі. Қазіргі таңда ең көп сұранысқа ие мамандықтар қатарында:
• медицина қызметкерлері (дәрігерлер, мейіргерлер және басқа мамандар);
• білім беру саласының мамандары (мұғалімдер, мектепке дейінгі және орта білім педагогтері);
• инженерлік-техникалық бағыттағы мамандар;
• ауыл шаруашылығы саласының қызметкерлері (агрономдар, ветеринарлар және басқа профильдік мамандар);
• көлік саласының мамандары (механизаторлар, тракторшылар және жүргізушілер);
• жұмысшы мамандықтары (электромонтерлер, электр мамандары, дәнекерлеушілер, токарьлар);
• құрылыс саласының мамандары (тас қалаушылар, бетоншылар, монтажшылар және әрлеушілер);
• басқару және әлеуметтік сала мамандары (бухгалтерлер, экономистер, мемлекеттік және әлеуметтік қызмет көрсету саласының қызметкерлері).
Министрліктің мәліметінше, бұл тізім өңірлік еңбек нарығындағы сұранысқа қарай тұрақты түрде жаңартылып отырады. Соның арқасында азаматтар өздерінің еңбек нарығындағы мүмкіндігін алдын ала бағалап, кәсіби дағдыларына сұраныс жоғары өңірді таңдай алады.
Сонымен қатар сервистің интерактивті картасында елді мекендер, әлеуметтік нысандар, инфрақұрылым және кеңес алуға болатын байланыс деректері көрсетілген. Бұл қоныс аударуды жоспарлау процесін анағұрлым ашық әрі ыңғайлы етеді.
Ведомствоның айтуынша, migration.enbek.kz порталындағы қызметтердің цифрландырылуы мемлекеттік қолдау шараларының қолжетімділігін арттырып, азаматтардың тұрғылықты жерін өзгерту туралы саналы шешім қабылдауына көмектеседі.
Еске салайық, Үкімет 2026 жылға арналған ерікті қоныс аудару өңірлері ретінде Абай, Шығыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарын бекіткен болатын.
Бұған дейін Ұлттық экономика министрлігі кәсіпкерлерге арналған жаңа онлайн сервистер іске қосылатынын хабарлаған еді. Атап айтқанда, бизнес өкілдері міндетті талаптар тізілімі мен мемлекеттік қолдау шараларының бірыңғай жүйесін онлайн пайдалана алады.