Қазақстанда медициналық туризмді дамыту аясында шетелдік пациенттерге қызмет көрсететін «бір терезе» қағидаты бойынша бірыңғай жүйе құрылмақ. Бұл туралы QazMonitor ҚР Денсаулық сақтау министрлігіне сілтеме жасап хабарлайды.
Ведомство 2030 жылға дейінгі медициналық туризмді дамытуға арналған тұжырымдамалық тәсілдерді әзірледі. Жаңа жүйе шетелдік азаматтарға алғашқы өтініштен бастап емделу аяқталып, кейінгі медициналық бақылауға дейін толық сүйемелдеуді қамтамасыз етеді.
Бірыңғай сервис арқылы пациенттер Қазақстандағы медициналық қызметтердің мүмкіндіктерімен танысып, емхана немесе клиниканы таңдай алады. Сондай-ақ қажетті құжаттарды рәсімдеп, онлайн консультация алып, сапарын жоспарлап, орналастыру мәселесін шешіп, емдеудің барлық кезеңінде қолдау қызметін пайдалана алады.
Жаңа модельді іске асыру аясында жеті негізгі бағыт бойынша жұмыс жүргізіледі. Олардың қатарында медициналық туризмді ұлттық және өңірлік деңгейде үйлестірудің бірыңғай жүйесін қалыптастыру, бірыңғай нормативтік талаптарды әзірлеу, медициналық қызметтердің сапасы мен қауіпсіздігін арттыру, бәсекеге қабілетті медициналық қызметтер пакетін қалыптастыру, Қазақстанның халықаралық деңгейдегі танымалдығын күшейту және медициналық ұйымдарды ынталандыру тетіктерін енгізу бар.
Денсаулық сақтау министрлігінің мәліметінше, жаңа жүйе шетелдік азаматтардың Қазақстанда медициналық көмек алу үдерісін барынша ыңғайлы әрі ашық етеді. Сонымен қатар бұл отандық денсаулық сақтау саласының бәсекеге қабілеттілігін арттырып, медициналық қызмет экспортын ұлғайтуға, қосымша инвестициялар тартуға және Қазақстанның Орталық Азиядағы өңірлік медициналық хаб ретіндегі позициясын нығайтуға мүмкіндік береді.
Министрлік 2030 жылға қарай медициналық көмек алу үшін Қазақстанға келетін шетелдік азаматтардың санын жылына 800 мың адамға дейін жеткізуді мақсат етіп отыр.