Қазақстанда әкімшілік рақымшылық аясында 590 мыңға жуық азаматқа қатысты 1,3 млн-нан астам әкімшілік өндірістің орындалуы тоқтатылып, жалпы сомасы 22 млрд теңгеден асатын айыппұлдар есептен шығарылды. Бұл туралы QazMonitor ІІМ-нің Polisia.kz порталына сілтеме жасап хабарлайды.
ІІМ Әкімшілік полиция комитетінің төрағасы Мұрат Қабденовтің айтуынша, әкімшілік рақымшылық – бір реттік ізгілік шарасы. Ол азаматтарды болашақта жасалатын құқық бұзушылықтар үшін жауапкершіліктен босатпайды.
Еске салайық, 1 шілдеде Президент рақымшылық туралы заңға қол қойған болатын. Құжат азаматтар мен мемлекеттің қауіпсіздігіне қатер төндірмейтін құқық бұзушылықтар бойынша жазаны ізгілендіруге бағытталған.
Әкімшілік рақымшылық жеке тұлғаларды, кәсіпкерлерді, жеке нотариустарды, адвокаттарды, қандастарды және басқа да азаматтарды заңда көзделген баптар бойынша әкімшілік айыппұлдарды төлеуден босатуды қарастырады.
Бұған дейін әкімшілік рақымшылық аясында есептен шығарылған айыппұлдар туралы азаматтарға SMS-хабарлама жіберілетіні хабарланған болатын.