Батыс Қазақстан және Маңғыстау облыстарында облыстық маңызы бар автомобиль жолдарының қауіпсіздігіне халықаралық стандарттарға сай аудит пен инспекция жүргізу басталды. Жобаны «Қазақстан жол ғылыми-зерттеу институты» АҚ (ҚазжолҒЗИ) жүзеге асырып жатыр, деп хабарлайды QazMonitor.
Жоба аясында жалпы ұзындығы 2 414 шақырым жол тексеріледі. Оның 1 384 шақырымы Батыс Қазақстан облысында, ал 1 030 шақырымы Маңғыстау облысында орналасқан. Негізгі мақсат – инженерлік ерекшеліктеріне байланысты жол қозғалысы қауіпсіздігін күшейтуді қажет ететін учаскелерді анықтау.
Дәстүрлі тексерулерден айырмашылығы, жол қауіпсіздігі аудиті жол инфрақұрылымын кешенді бағалауды қамтиды. Мамандар жолдың геометриялық параметрлерін, көріну қашықтығын, жол жабынының жағдайын, жол белгілері мен таңбаларын, қоршауларды, жол жиектерін, жаяу жүргіншілер өткелдерін, қоғамдық көлік аялдамаларын, сондай-ақ қиылыстарды жан-жақты саралайды.
Жұмыс барысында ҚазжолҒЗИ Чехияның Брно қаласындағы CDV (Centrum dopravního výzkumu) Көлік зерттеулері орталығының тәжірибесіне негізделген халықаралық әдістемені қолданады. Институт аталған ғылыми орталықпен жасалған меморандум аясында тәжірибе алмасып, мамандар даярлау және бірлескен жобаларды жүзеге асырып келеді.
Зерттеу заманауи мобильді жол зертханасының көмегімен жүргізілуде. Арнайы диагностикалық кешен автоматты режимде жол жабынының тегістігі мен із тереңдігін өлшеп, цифрлық модель қалыптастырады, жарықтар, шұңқырлар мен басқа да ақауларды тіркейді. Сондай-ақ жол инфрақұрылымы толық фото және бейнетүсірілімнен өтеді.
Тексеру қорытындысы бойынша қауіпсіздікті арттыруға бағытталған инженерлік ұсынымдар әзірленіп, барлық дерек географиялық координаттарға байланыстырылған бірыңғай цифрлық базаға енгізіледі. Соның негізінде бірінші кезекте жөндеу мен қосымша шараларды қажет ететін жол учаскелерінің картасы жасалады.
Мамандардың айтуынша, халықаралық тәжірибені енгізу жолдағы жекелеген ақауларды жоюмен шектелмей, жол қозғалысы қауіпсіздігіне әсер ететін факторларды жүйелі бағалауға мүмкіндік береді. Бұл тәсіл әлемдік тәжірибеде кеңінен қолданылады және жол инфрақұрылымын тиімді дамытуға негіз болады.