Шығыс Қазақстан облысының орталығында бағдарламалау және жасанды интеллект бағытындағы Tomorrow School іске қосылады. Жоба Д. Серікбаев атындағы Шығыс Қазақстан техникалық университетінің базасында облыс әкімдігінің қолдауымен жүзеге асырылуда, деп хабарлайды QazMonitor.
Tomorrow School — Қазақстандағы peer-to-peer форматында жұмыс істейтін алғашқы мектеп. Мұнда дәстүрлі дәрістердің орнына қатысушылар өздігінен білім алып, бір-біріне көмектеседі, практикалық тапсырмалар орындайды, емтихан тапсырады, командалық жобалар әзірлейді және жеке IT-портфолиосын қалыптастырады.
Білім беру бағдарламасына 50-ден астам практикалық жоба, Go, JavaScript, Rust және Python бағдарламалау тілдері, жасанды интеллект, киберқауіпсіздік және Blockchain бағыттары енгізілген.
Жобаның басты ерекшеліктерінің бірі — жастардың технологиялық ортада тұрақты жұмыс істеуіне жағдай жасау. Қатысушылар үшін тәулік бойы жұмыс істейтін кампус, кәсіби IT-қоғамдастық және нетворкинг алаңы қарастырылған.
Оқудың алғашқы кезеңінде 24 тамыз бен 19 қыркүйек аралығында төрт апталық «Бассейн» интенсиві өтеді. Қатысушылар практикалық тапсырмаларды орындап, емтихан тапсырады және топтық жобалармен жұмыс істейді. Барлығы төрт интенсив өткізіліп, олар 150 адамға дейін қамтылады.
Іріктеу қорытындысы бойынша 18 жастан асқан 25 қатысушы Tomorrow School-дың негізгі бағдарламасы бойынша оқуын жалғастырады. Бағдарламаның ұзақтығы — екі жыл.
Алғашқы интенсивке тіркелу 21 тамызға дейін жалғасады. Check-In 21 тамызда өтеді.
Өтетін мекенжайы: Өскемен қаласы, Протозанов көшесі, 69, Д. Серікбаев атындағы ШҚТУ корпусы, 405-аудитория.