Қостанай облысында астықты терең өңдеу кешенін салу жоспарланып отыр. Жобаны талқылауға KAZAKH INVEST басқарма төрағасы Сұлтанғали Кенжеқұлов, сингапурлық XiYu Agricultural Pte. Ltd. компаниясының бас директоры Гэ Кайхуа, сондай-ақ SINOMACH корпорациясының құрамына кіретін қытайлық SUMEC International компаниясының өкілдері қатысты, деп хабарлайды ұлттық компанияның баспасөз қызметі.
«Қазақстанның аграрлық әлеуеті зор және ауыл шаруашылығы өнімдерін терең өңдеуді дамытуға мүмкіндігі зор. KAZAKH INVEST мұндай стратегиялық жобаларды жүзеге асыруға ниетті инвесторларға жан-жақты қолдау көрсетуге дайын. Бұл бастамалар жаңа жұмыс орындарын ашып қана қоймай, ел ішінде қосылған құн тізбегін қалыптастыруға ықпал етеді», – деді Сұлтанғали Кенжеқұлов.
Жоба шеңберінде жалпы инвестиция көлемі шамамен 230 млн долларды құрайтын агроөнеркәсіп кешенін салу көзделген. Алдын ала есеп бойынша, бұл бастама 500 жаңа жұмыс орнын ашуға және жыл сайын 8 млрд теңге көлемінде салық түсімін қамтамасыз етуге мүмкіндік береді.
Кешен құрамына жылына 125 мың тонна лимон қышқылын, 200 мың тонна тазартылмаған күнбағыс майын, 360 мың тонна мал азығына арналған ұн, сондай-ақ 100 мың тонна күкірт қышқылын өндіретін желілер кірмек. Жоба жоғары қосылған құны бар дайын өнімді Таяу Шығыс, Еуропа, Түркия және Қытай елдеріне экспорттауға бағытталған.
«Біз Қазақстанды өңделген ауыл шаруашылығы өнімдерінің экспорттық хабы ретінде зор әлеуетке ие ел деп санаймыз. Қостанай облысындағы жоба біздің осы елдегі ұзақмерзімді қатысуымыздың жаңа кезеңі болмақ, сонымен қатар біз Қазақстанның өнеркәсіптік және экспорттық әлеуетін арттыруға өз үлесімізді қосуға ниеттіміз», - деді Гэ Кайхуа.