Алматыда жүргізушісіз көліктерді қалалық ортада сынақтан өткізуге дайындықтың жаңа кезеңі басталды. Еліміздің жасанды интеллект және цифрлық даму министрлігінің қолдауымен Yandex Qazaqstan қала көшелерінің жоғары дәлдіктегі цифрлық картасын жасауға кірісті, деп хабарлайды QazMonitor.
Арнайы жабдықталған көліктер Алматы көшелерінде жол инфрақұрылымы туралы деректерді жинай бастады. Олар жолақтар, бағдаршамдар, жол белгілері, қиылыстар және қалалық ортаның басқа да элементтері туралы ақпаратты тіркейтін лидарлармен, камералармен және өзге де сенсорлармен жабдықталған. Жиналған мәліметтер негізінде жол инфрақұрылымының егжей-тегжейлі цифрлық моделі жасалады.
Жоғары дәлдіктегі карта автономды көлік технологиясының негізгі элементтерінің бірі саналады. Онда жолақтар, қиылыстар, жол белгілері, бағдаршамдар және маршруттағы басқа да нысандар туралы егжей-тегжейлі деректер қамтылады. Бұл жүргізушісіз көлікке өз орнын дәл анықтап, қалалық ортада бағдарлануға мүмкіндік береді.
«Жасанды интеллект нақты экономика салалары мен адамдардың күнделікті өмірін өзгертетін қолданбалы технологияға айналуы керек. Автономды көлік осы өзгерістің ең айқын мысалдарының бірі. Қазақстанда автономды көліктерді қалалық ортада сынақтан өткізуге қажетті нормативтік жағдайлар қазірдің өзінде жасалды. Келесі кезең – қажетті технологиялық инфрақұрылымды қалыптастыру. Алматының жоғары дәлдіктегі картасын жасау осы жұмыстың бір бөлігі. Бұл ретте негізгі қағидат қауіпсіздік болып қала береді. Сондықтан автономды көлікті енгізу технологияларды сынақтан өткізу, нақты жол жағдайларын талдау және реттеу тетіктерін одан әрі жетілдіру арқылы кезең-кезеңімен жүзеге асырылады», – деді Қазақстан Республикасы премьер-министрінің орынбасары – Жасанды интеллект және цифрлық даму министрі Жаслан Мәдиев.
Жоба Қазақстанда автономды көлік технологияларын нақты қалалық ортада қауіпсіз сынақтан өткізу және енгізу үшін қажетті жағдайларды кезең-кезеңімен қалыптастыру аясында жүзеге асырылып жатыр. Қазір елде жүргізушісіз көліктерді пилоттық режимде сынауға қатысты нормативтік және технологиялық тәсілдер айқындалуда.
Алматы қаласы цифрландыру басқармасының басшысы Сәбит Нұрқанаттың айтуынша, қала күрделі әрі алуан түрлі көлік инфрақұрылымына ие болғандықтан, жаңа технологияларды қауіпсіз енгізу үшін оның ерекшеліктерін ескеру маңызды.
«Картографиялау қалалық ортаның ерекшеліктерін ескеруге және жобаның келесі кезеңдеріне қажетті технологиялық негіз қалыптастыруға мүмкіндік береді», – деді ол.
Yandex Qazaqstan мәліметінше, қазіргі кезеңде арнайы көліктер тек қалалық ортаны картографиялаумен айналысады және жолаушыларды автономды режимде тасымалдамайды.
«Жоғары дәлдіктегі карта жасау – автономды көлік технологиясын Алматы жағдайында қолдануға дайындаудың маңызды кезеңі. Қалалық орта үнемі өзгеріп отырады. Бұған қиылыстар, жолақтар, бағдаршамдар, жол белгілері және қозғалысты ұйымдастырудың әртүрлі сценарийлері жатады. Автономды көлік маршрут бойынша дәл бағдарлануы үшін осы деректерді жинап, жүйелеу қажет. Қазір біздің көліктер қала аумағын картографиялаумен айналысып жатыр. Жобаның келесі кезеңдері туралы бөлек хабарлаймыз», – деді Yandex Qazaqstan басшысы Тимур Шалекенов.
Автономды көлік технологиясында бағдарламалық және аппараттық шешімдер кешені қолданылады. Лидарлар нысандарға дейінгі қашықтықты анықтап, қоршаған кеңістіктің үш өлшемді моделін жасауға мүмкіндік береді. Камералар жол белгілерін, бағдаршам сигналдарын және басқа да визуалды нысандарды таниды, ал қосымша сенсорлар жолдағы жағдай туралы деректерді толықтырады.
Осы ақпараттың негізінде жүйе көліктің орналасқан жерін анықтап, басқа қозғалыс қатысушылары мен айналадағы нысандарды тани алады, жолдағы жағдайдың өзгеруін болжайды және қозғалыстың келесі траекториясын қалыптастырады.