2026 жылдың 1 желтоқсанынан бастап Астанада қоғамдық көлікте қолма-қол ақшасыз төлем жасау ақысы 110 теңгеден 150 теңгеге дейін өсуі мүмкін. Шешім тасымалдаушылардың шығыны айтарлықтай өскендіктен қабылданып отыр. Бұл туралы Kapital.kz іскерлік ақпарат орталығы хабарлады.
Елордада қоғамдық көлікпен жүру тарифі (90 теңге) соңғы рет 2014 жылы белгіленген еді.
«12 жыл ішінде жолақы бір-ақ рет қайта қаралып, қазір 110 теңге болып отыр. Сонымен бірге 2014 жылдан бері тасымалдаушылардың негізгі шығындары: отын, қосалқы бөлшектер мен жаңа автобустардың бағасы, сондай-ақ жүргізушілердің еңбекақысы едәуір өсті. Мәселен, 2014 жылы дизель отынының литрі шамамен 107 теңге болса, қазір 329 теңгеге жетті. Осылайша, отын бағасы үш еседен астам қымбаттады. Жүргізушілердің де жалақысы айтарлықтай өсті. Егер 2014 жылы олар орта есеппен 100–150 мың теңге алса, қазір автобус санаты мен жұмыс кестесіне қарай жалақы 700 мың теңгеден басталады», — делінген хабарламада.
Әкімдік өкілдері қосалқы бөлшектердің, автокөлік шиналары мен аккумуляторлардың, автобустарды техникалық күтіп-ұстау мен жөндеудің, сондай-ақ жаңа автобустар сатып алудың да құны қымбаттағанын атап өтті.
Соған қарамастан, тегін жүру жеңілдіктері толық сақталады. Тегін жүру құқығы төмендегі азаматтар санаттарына беріледі:
1. Ұлы Отан соғысының қатысушылары, мүгедектері және оларға теңестірілген тұлғалар;
2. Жасы мен еңбек сіңірген жылдары бойынша зейнеткерлер, сондай-ақ жасы бойынша және зейнет жасына жеткен асыраушысынан айырылу жағдайы бойынша мемлекеттік әлеуметтік жәрдемақы алушылар;
3. Көпбалалы аналар;
4. Көпбалалы отбасылар;
5. Мүгедектігі бар адамдар;
6. 18 жасқа дейінгі мүгедектігі бар балалар және олардың ата-анасының біреуі (заңды өкілдері);
7. «Жаппай саяси репрессиялар құрбандарын ақтау туралы» ҚР Заңында белгіленген тәртіппен ақталған 1986 жылғы 17-18 желтоқсан оқиғаларына қатысқан саяси репрессия құрбандары.
Сондай-ақ 2020 жылдың наурыз айынан бастап Астанада оқитын 18 жасқа дейінгі балалар да тегін қатынайды.
«Шығындардың өсуіне, қоғамдық көліктің үздіксіз жұмысын қамтамасыз ету, автобус паркін одан әрі жаңарту және бағдарлар желісін дамыту қажеттілігіне байланысты 1 желтоқсаннан бастап қолма-қол ақшасыз төлегенде жолақыны 150 теңге етіп белгілеу ұсынылады», — деп хабарлады әкімдік.