Атырау облысының Экология департаменті «Магистралды су құбыры» ЖШС-не ластанған топырақ қалдықтарының жиналуына белгіленген лимиттерді бұзғаны үшін 334,1 млн теңге әкімшілік айыппұл салды, деп хабарлайды QazMonitor.
Анықталған фактілер бойынша департамент Қазақстан Республикасының Әкімшілік құқық бұзушылық туралы кодексіне сәйкес әкімшілік іс қозғап, тиісті хаттама жасаған.
Компания қабылданған шараларға сот арқылы шағымданған. Алайда Атырау қаласының әкімшілік құқық бұзушылық жөніндегі мамандандырылған соты шағымды қанағаттандырмады. Кейін Атырау облыстық сотының қылмыстық істер жөніндегі алқасы да компанияның шағымын қанағаттандырған жоқ.
Осылайша, сот шешімдері «Магистралды су құбыры» ЖШС-нің әкімшілік құқық бұзушылық жасағанын растады. Компанияға 334,1 млн теңге айыппұл салу туралы шешім күшінде қалды.
Қазіргі уақытта айыппұл толық көлемде өндіріліп, мемлекеттік бюджетке аударылды.