2026 жылдың алғашқы тоғыз айында Skills Enbek онлайн-платформасында 114,8 мыңнан астам адам оқудан өтті. Олардың шамамен 47%-ы ауылдық елді мекендердің тұрғындары. Бұл туралы Қазақстан Республикасы Еңбек және халықты әлеуметтік қорғау министрлігі хабарлады.
Оқуды аяқтағандардың 43,3 мыңы – жұмыссыз азаматтар. Олардың ішінде 16–34 жас аралығындағы 12,3 мың жас және ауыл тұрғындарының 23,5 мыңы бар.
Skills Enbek платформасы азаматтарға қосымша білім алып, жұмысқа орналасуға және кәсіби қызметте қажет дағдыларды меңгеруге мүмкіндік береді. Курстарды компьютер немесе Enbek мобильді қосымшасы арқылы, өзіне ыңғайлы уақытта оқуға болады.
Қазір платформада 1,3 млн-нан астам пайдаланушы тіркелген. Жұмысын бастағаннан бері 1,29 млн-нан астам сертификат берілген. Пайдаланушыларға әртүрлі ұйымдар әзірлеген 565 курс ұсынылған, олардың 60%-дан астамы тегін.
Ең сұранысқа ие бағыттардың қатарында ақпараттық технологиялар, қаржы және бухгалтерлік есеп, әлеуметтік қызмет көрсету, тұрғын үймен қамту және тамақтану, сауда мен қойма, сондай-ақ ауыл шаруашылығы бар.
Курсты аяқтап, қорытынды тестілеуден сәтті өткен азаматтарға электрондық сертификат беріледі. Оқу нәтижелері Enbek.kz Электрондық еңбек биржасындағы түйіндемеге автоматты түрде енгізіледі. Бұл жұмыс іздеушілерге кәсіби профилін толықтыруға, ал жұмыс берушілерге үміткерлердің білімі мен дағдылары туралы ақпарат алуға мүмкіндік береді.
Платформа жұмыс іздеп жүрген азаматтарға ғана емес, білімін жетілдіріп, жаңа құралдарды меңгеруге немесе біліктілігін арттыруға ниетті мамандарға да арналған.
Skills Enbek курстары туралы толық ақпаратты skills.enbek.kz сайтынан алуға болады.