Су ресурстары және ирригация министрлігі суару суын пайдаланушыларға өтемақы қайтару мақсатында 18 табиғи монополия субъектісінің тарифтерін уақытша төмендетті. Нәтижесінде тұтынушыларға жалпы 177 млн теңге өтелмек.
Министрліктің мәлімдеуінше, биыл 15 наурызда мемлекет басшысының тапсырмасымен суару суына тариф белгілеу және реттеу құзыреті ведомствоға берілген болатын. Министрлік 1 мамырдан бастап су жеткізу, егістік алқаптарын суару және гидротехникалық құрылыстар арқылы жерүсті су ағысын реттеу қызметтерін мемлекеттік реттеуге кірісті.
2024 жылға арналған тарифтік сметалар мен инвестициялық бағдарламалардың орындалуына қатысты табиғи монополия субъектілерінің 63 есебі тексеру нәтижесінде бірқатар жоспарлардың толық орындалмағаны анықталған. Осыған байланысты каналдар арқылы су беру, гидротехникалық құрылыстар арқылы су ағысын реттеу қызметін көрсететін 18 ұйымға уақытша өтемдік тариф енгізу туралы шешім қабылданды.
«Қазір бұл ұйымдардың басым бөлігінде уақытша өтемақы тарифтері күшіне енді. Тарифтер бір жыл мерзімге енгізіледі. Заң бойынша табиғи монополия субъектілері жыл сайын 1 мамырға дейін алдыңғы жылғы тарифтік смета мен инвестициялық бағдарламаның орындалуы туралы есеп тапсыруы қажет», — деді Су ресурстары және ирригация министрі Нұржан Нұржігіт.