Алматы облысында жылына 1,2 млн тонна болат өндіретін жаңа зауыттың құрылысы басталды. Asia United Steel зауытында 600 жұмыс орнын ашу көзделген.
Жоба үш кезеңде жүзеге асырылып, елдің оңтүстігіндегі ең ірі металлургиялық кәсіпорындардың біріне айналады деп жоспарланып отыр.
«Asia United Steel зауытының құрылысы – өңірдің жаңа индустриялық серпіліске жасаған қадамы. Әрбір осындай зауыт – жаңа мүмкіндіктер, жұмыс орындары, технологиялар мен бюджетке құйылатын салық. Облыс өз өндірістік қаңқасын қалыптастырып, ел экономикасын нығайтып келеді, жоба стратегиялық маңызға ие», деді нысанның алғашқы іргетасын қалау рәсіміне қатысқан Алматы облысының әкімі Марат Сұлтанғазиев.
Өндірістік алаң «Қазыбек бек» индустриялық аймағында 78 гектар жерге орналаспақ. Жалпы, бұл аймақта жалпы құны 640 млрд теңгеден асатын жобалар портфелі бар 11 инвестор орналасқан, шамамен 2,5 мың жұмыс орнын қамтамасыз етеді.
Алматы облысы индустриялық аймақтарының басқарушы компаниясының бас директоры Ербол Шокаевтың айтуынша, инвесторларға индустриялық аймақтың 900 гектарының 567 гектары бөлінген. Алдағы екі жылда аймақ толыққанды инженерлік инфрақұрылыммен қамтамасыз етіледі — 150 МВт электр қуаты, тәулігіне 8000 м³ су, тәулігіне 100 вагондық жүк жөнелтуге мүмкіндік беретін теміржол логистикасы. Құрылысты бастау үшін қатысушылар уақытша электр және су желілерімен қамтылған.
«Біз сіздермен ынтымақтастықта қуана жұмыс істейміз. Ұзақ талдаудан кейін болат өндіру зауытын салу үшін дәл осы өңірді таңдадық. Мақсатымыз -Орталық Азияны шикізатпен қамтамасыз етіп, заманауи өндіріс құру», деді жоба инвесторы, Asia United Steel компаниясының негізін қалаушы Лин Гуощун.
Айта кетейік, жобаны толықтай шетелдік инвесторлар қаржыландырады. Өндіріс ішкі және сыртқы нарықта жоғары сұранысқа ие құрылыс және өндірістік өнімдер өндіруге бағытталады.
Кәсіпорын құрылысы бірнеше кезеңнен өтіп 2027 жылға дейін толық аяқталады. Зауыт балқытуға арналған энергия тиімді пештермен жабдықталады. Электр энергиясының қолданылуы қоршаған ортаға келетін зиянды барынша азайтады, ал өндіріс толықтай экологиялық стандарттарға сай болады, деді әкімдікте.