1 желтоқсаннан бастап Қазақстан азаматтары мен бизнесін қауіпсіздік, қаржы және денсаулық сақтау салаларындағы бірқатар маңызды өзгерістер қарсы алады. Елде жаңа жылдық мерекелер қарсаңындағы профилактикалық рейдтер басталып, жеке тұлғаларға арналған автолизингтің жаңа бағдарламасы іске қосылады. Сондай-ақ дәрі-дәрмектерді тіркеу ережелеріне өзгерістер енгізу арқылы тұрғындардың күнделікті өміріне тікелей әсер ететін бірнеше шешімдер күшіне енеді.
Жеке тұлғаларға арналған автолизинг
1 желтоқсаннан бастап Қазақстанда жеке тұлғалар үшін автолизингтің жаңа бағдарламасы іске қосылады. Бұл бағдарлама қазақстандықтарға көлік сатып алудағы қосымша мүмкіндік болмақ, әрі қазіргі жеңілдетілген автонесиелеуге балама ұсынады. Автолизинг – бұл ұзақ мерзімді жалға беру формасы, онда жеке тұлға көлікті белгілі бір мерзімге (әдетте екі жылдан бес жылға дейін) пайдалануға алады, ай сайын төлем жасайды. Ерекшелігі сол, бұдан былай азаматтар көлікті кейіннен сатып алу немесе қайтару шартымен лизинг келісімі бойынша алуды таңдай алады. Бұл жүйе көлікке үлкен алғашқы жарнасыз ие болуға мүмкіндік беретін экономикалық икемділік береді.
Полицейлер мен құтқарушылардың рейді
Жаңа жылдық мерекелер қарсаңында қоғамдық қауіпсіздікті қамтамасыз ету мақсатында, 2025 жылғы 1 желтоқсаннан бастап Төтенше жағдайлар министрлігі мен Ішкі істер министрлігі бірлескен профилактикалық науқанды бастайды. Бұл рейдтер газ-баллон жабдықтарын және пиротехниканы қолдануға қатысты бұзушылықтардың алдын алуға бағытталған. Тек кәсіпкерлер ғана емес, қарапайым азаматтар да тексеріледі. Сонымен қатар, рейдтер жаппай Жаңа жылдық іс-шаралар өтетін орындарды да қамтиды, оның ішінде эвакуациялық шығу орындары, өрт дабылы жүйелері және өрт қауіпсіздігі нормаларының сақталуы қатаң тексеріледі. Бұл шаралар мыңдаған қазақстандықтардың мерекелік кезеңдегі қауіпсіздігін қамтамасыз етуде шешуші рөл атқарады.
Дәрі-дәрмектерді тіркеу ережесі
Бұған дейін Денсаулық сақтау министрлігі дәрілік заттар мен медициналық бұйымдарды мемлекеттік тіркеу және қайта тіркеу ережелеріне түзетулер енгізді. Аталған бұйрық 2025 жылдың 1 желтоқсанынан бастап күшіне енеді. Құжатқа сәйкес, тіркеу кезінде Қазақстанда өндірілген дәрілік заттарды қоспағанда, дәрілік заттар үшін тіркеу куәлігінің қолданылу мерзімі 5 жылға белгіленеді.
Алайда, Қазақстанда өндірілген дәрілік заттар мен медициналық бұйымдар үшін мерзімсіз тіркеу куәлігі беріледі. Бұл өзгеріс отандық өндірушілерді ынталандыруға және тұтынушылар үшін дәрі-дәрмектердің қауіпсіздігі мен қолжетімділігін реттеуге бағытталған.
Ипотекалық бағдарлама аяқталады
Бүгін – «Отбасы банкінің» «Наурызға» ипотекалық бағдарламасының соңғы күні. Бұл бағдарлама бойынша өтінім қабылдау 3 қараша басталған болатын. Бағдарламаға «Отбасы банкінің» барлық салымшылары, сондай-ақ кемінде 2 миллион теңге жинағы бар және соңғы бес жылда өз атында тұрғын үйі болмаған (оның ішінде отбасы мүшелері) клиенттер қатыса алды.
Желтоқсандағы демалыстар
Желтоқсанда қазақстандықтар Тәуелсіздік күніне орай қосымша демалыс алады. 2025 жылы 16 желтоқсан сейсенбіге түскендіктен, бұл күні демалады. Бес күндік жұмыс аптасында желтоқсанда барлығы 9 демалыс және 22 жұмыс күні, ал алты күндік жұмыс аптасында 4 демалыс және 26 жұмыс күні бар.
Сонымен қатар мектеп оқушылары 29 желтоқсаннан бастап қысқы каникулға шығады.