Қазақстандағы автокөлік жасау саласы соңғы жылдары үлкен қарқын алып, ұлттық өнеркәсіптің басты бағыттарының біріне айналды. Алматы индустриялық аймағында қалыптасқан жаңа автокластер бұл өсімді айқын көрсетеді. Мұнда жұмыс істейтін толық циклді, көпбрендті Astana Motors Manufacturing Kazakhstan зауыты бүгінде Chery, GWM, Changan секілді әлемдік маркалардың көліктерін құрастырып, елді өңірдегі маңызды автоөндірушілердің қатарына шығарып отыр. Chery Tiggo 2 Pro, Haval Jolion, Changan CS55 Plus сияқты үлгілер – осы дамудың айғағы.
Кәсіпорынның жылдық қуаттылығы 120 мың автомобильді құрайды, бұл ішкі нарықты қамтамасыз етуге ғана емес, экспорттық мүмкіндіктерді кеңейтуге де жол ашады. Зауыттағы жоғары технологиялы желілер бір мезетте 12 түрлі модельді құрастыруға қабілетті және нарықтағы өзгерістерге жылдам бейімделеді.
Экологиялық стандарттарға да ерекше көңіл бөлінген. AMMKZ – ТМД аумағында бояу цехында құрғақ коагуляция технологиясын енгізген алғашқы зауыт. Бұл әдіс энергия тұтынуды 35%-ға азайтып, су мен химиялық реагенттерді мүлде қолданбайды, ал ауа тазарту тиімділігін 60%-ға арттырады. Жобаға салынған 215 млрд теңгеден асатын инвестицияның құрылыс және инженерлік жұмыстарының көп бөлігі қазақстандық мамандардың күшімен жүзеге асқан.
Автокластердің тағы бір ірі орталығы – Hyundai Trans Kazakhstan. 2025 жылдың 10 айында зауыт 43 мыңнан астам көлік шығарып, өндіріс көлемін айтарлықтай арттырды. Мұнда роботтандырылған желілер іске қосылып, ұсақ тораптық жинақ үлесі өсті. Зауыт Tucson, Elantra, Santa Fe, Palisade және Hyundai мен Genesis модельдерінің басқа түрлерін құрастырады.
Бұл өндірістік өрлеу жаңа жұмыс орындарын ашуға да зор үлес қосты. 2025 жылы Hyundai Trans Kazakhstan 500-ден астам қызметкерді жұмысқа қабылдады. Жалпы алғанда, жаңа зауыттардың іске қосылуы жүздеген қазақстандықты жұмыспен қамтып, инженерлік кадрларға сұраныс өсіп, машина жасау саласы үшін жаңа мүмкіндіктер ашылып отыр.
Дереккөз: ҚР Өнеркәсіп және құрылыс министрлігі