Биыл Қарағанды облысының ауылдық елді мекендерінде 66 фельдшерлік-акушерлік пункт салынды, оның 51-і – қайтарылған активтер есебінен қаржыландырылған.
Өңір әкімдігі 2025 жылғы денсаулық сақтау саласының қорытындыларын жариялады.
«Ауылдық елді мекендерде 66 фельдшерлік-акушерлік пункт салынды, оның 51-і – қайтарылған активтер есебінен. Арнайы мемлекеттік қордың қаражаты есебінен Балқашта балаларды оңалту орталығына арналған ғимарат жөнделді. Алты ірі стационардың құрылыс-монтаж жұмыстары аяқталды», делінген ақпаратта.
Сондай-ақ «Қазақстан халқына» қорының қолдауымен онкоорталық заманауи сызықтық үдеткіш пен компьютерлік томограф алды. Бұдан бөлек, арнайы мемлекеттік қор қаражаты есебінен онкоорталықтың операциялық-реанимациялық блогын жабдықтау қаржыландырылған. Бұған қоса, Макажанов атындағы клиникаға нейрохирургиялық Remebot RM-200 роботы сатып алынды.
Сонымен қатар өңірде кадрлық әлеуетті күшейту бағытында жұмыс қарқынды жүріп жатқаны туралы айтылды.
Биыл өңірге 137 жас дәрігер келіп, оның 61-і ауылдық жерлерге жұмысқа орналасқан. Жас мамандарға берілетін көтерме ақы 8,5 млн теңгеге дейін ұлғайтылды. Облыста жұмыс істейтін 30 медицина қызметкері шетелде біліктілігін арттырды.
Дереккөз: Қарағанды облысы әкімдігі