Елімізде 2025 жылы 2-6 жас аралығындағы балаларды мектепке дейінгі тәрбие мен оқытумен қамту деңгейі 95,9%-ға жетті. Бұл туралы Орталық коммуникациялар қызметіндегі брифингте Оқу-ағарту министрлігінің өкілдері мәлімдеді.
2019 жылдан бергі кезеңде мектепке дейінгі ұйымдар саны 8,6%-ға өсіп, 10 650-ден 12 мыңға дейін көбейді. Бүгінде бұл балабақшаларда 1 миллионнан астам бала тәрбиеленуде.
Бірінші вице-министр Майра Мелдебекованың айтуынша, өңірлерде балабақша жетіспеушілігін жою мақсатында ауқымды жұмыс жүргізіліп жатыр:
«Мемлекет басшысының тапсырмасымен өңірлерде балабақшаларды іске қосу жөніндегі 2023-2027 жылдарға арналған қадамдық жоспар бекітілген, оның аясында 2027 жылға дейін 300 мың орын пайдалануға берілуі тиіс. 2023 жылдан бастап бүгінге дейін 182 мың жаңа орын ашылды. Биыл өткен жылмен салыстырғанда кезектілік жалпы кезектілік 33,3 %-ға, 2-6 жас аралығында кезекте тұрған балалар саны екі есеге қысқарды», – деді Оқу-ағарту бірінші вице министрі Майра Мелдебекова.
Министрлік өкілдері атап өткендей, балаларға тең бастапқы мүмкіндіктер жасау және мектепке дейінгі білім беру қолжетімділігін арттыру үшін тұрақты мемлекеттік қолдау көрсетіліп келеді. Қазіргі таңда барлық мемлекеттік балабақшалар мен жекеменшік ұйымдардың 94%-ы мемлекеттік білім беру тапсырысы аясында қаржыландырылады.
Дереккөз: ҚР Оқу-ағарту министрлігі