Қазақстанда әйелдердің кәсіпкерлік белсенділігі тұрақты өсім көрсетіп отыр. 2025 жылғы желтоқсандағы дерекке сәйкес, елдегі шағын және орта бизнесте (ШОБ) 1 млн-нан астам әйел басшы тіркелген. Бұл - барлық ШОБ субъектілерінің 48,1%-ын құрайды.
Бұл туралы Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия отырысында Ұлттық экономика бірінші вице-министрі Азамат Әмрин мәлімдеді. Оның айтуынша, әйелдер кәсіпкерлігін дамыту - экономикалық өсімнің маңызды нүктелерінің бірі.
Әйелдер негізінен сауда, қызмет көрсету, сұлулық индустриясы, қоғамдық тамақтану, білім беру, экологиялық және әлеуметтік жобалар бағыттарында белсенді. Бұл секторлар өңірлік экономиканы нығайтып, тұрақты әрі қоғамға бағдарланған бизнестің дамуына ықпал етіп отыр.
Бүгінде елде 20 кәсіпкерлерге қызмет көрсету орталығы және шағын қалалар мен ауылдарда 188 өңірлік орталық жұмыс істейді. Олар кәсіпкерлерге тегін кеңес беріп, бизнесті бастау мен дамытуға сүйемелдеу көрсетеді.
2025 жылғы 1 желтоқсанға дейін: 16 326 әйелге 60 245 ақпараттық және консультациялық қызмет көрсетілді. Сонымен қатар 6 410 әйел сервистік қолдау аясында бухгалтерлік есеп, салық, есептілік, бизнес-жоспар және маркетинг бойынша 7 106 қызмет алды.
Әйелдер кәсіпкерлігін қолдау бірнеше бағыт арқылы жүзеге асырылады:
Ақпараттық-консультациялық көмек — бизнес тіркеу, мемлекеттік қолдау, тендерге қатысу. Сондай-ақ сервистік қолдау — жұмыс істеп тұрған бизнесті дамытуға арналған практикалық қызметтер көрсетіледі.
«Іскерлік байланыстар» бағдарламасы — шетелдік әріптестермен ынтымақтастық және тағылымдамалар (37 кәсіпкер, оның ішінде 10 әйел).
«Бір ауыл – бір өнім» жобасы — қатысушылардың 90%-ы әйелдер. 742 әйел кеңес алып, 38 қатысушы финалист атанды. Жоба 5 млн теңгеге дейін грант алуға мүмкіндік береді.
Сонымен қатар, Еуропалық қайта құру және даму банкі мен бірлескен «Бизнестегі әйелдер» бағдарламасы аясында 2015 жылдан бері 6,3 мыңнан астам әйел оқытылып, ШОБ-ты кредиттеуге 102,2 млрд теңге бағытталған.
Мемлекеттік субсидиялау және кепілдік беру тетіктері әйелдерге қаржыға қолжетімділікті арттырды: 316,9 млрд теңгеге 2 280 жоба қолдау тапты, оның 41%-ы әйелдерге тиесілі. 60,5 млрд теңгеге 736 жобаға кепілдік берілді, оның ішінде 338 жоба - әйелдер кәсіпкерлігі.
Дереккөз: Экономика министрлігі