Қазақстанда электр станцияларындағы жөндеу жұмыстарына бағытталған капиталдық салымдар көлемі 20 пайызға өсті. Бұл туралы Энергетика министрі Ерлан Ақкенженов журналистермен кездесуінде айтты.
Министр ұзақ уақыттан кейін алғаш рет ел бойынша жылу электр орталықтарының жабдықтарының жалпы тозу деңгейі төмендей бастап, бүгінде 61 пайызды құрағанын айтты. Барлық жоспарланған жөндеу жұмыстарын орындау нәтижесінде Кентау, Риддер және Екібастұз қалаларындағы станцияларды қоса алғанда, тоғыз энергия көзі тәуекел аймағынан шығарылды.
Жылу желілерін жаңғырту аясында 323 шақырым құбыр желілері ауыстырылып, бұл тұтынушыларды тұрақты жылумен қамтамасыз етуге және тозу деңгейін 52 пайызға дейін төмендетуге мүмкіндік берді. Сонымен қатар жылу желілеріндегі апаттылық деңгейі 25 пайызға азайды.
«Қолданыстағы инфрақұрылымды қалпына келтірумен қатар жаңа генерациялаушы қуаттарды іске қосу қамтамасыз етілді. 2025 жылы Текелі энергетикалық кешенінде газтурбиналық қондырғылар пайдалануға берілді, ал Топар ГРЭС-те қуаты 130 МВт болатын жаңа турбоагрегат іске қосылды. Жыл қорытындысы бойынша елдің энергожүйесі электр энергиясын өндіру бойынша рекордтық 118 миллиард киловатт-сағат көрсеткішіне қол жеткізіп, сұраныстан озық режимде жұмыс істеді», – деді Ерлан Ақкенженов.
Келесі жылдан бастап ведомство өңірлік деңгейде жылумен жабдықтау схемаларын қайта қарау бойынша жүйелі жұмысқа кіріседі. Пилоттық жобалар Жамбыл облысы мен Шымкент қаласында айқындалды.
Дереккөз: Энергетика министрлігі