Қазақстанда геологиялық саланы жаңғырту жұмыстары нәтижесінде мемлекеттік есепке 103 түрлі пайдалы қазба мен еліміз бойынша шамамен 10 мың кен орны алынған. Бұл туралы ҚР Өнеркәсіп және құрылыс вице-министрі Иран Шархан мәлімдеді.
Оның айтуынша, бүгінде қатты пайдалы қазбалар бойынша 2 907 лицензия және 251 келісімшарт қолданыста. Ал биылдың өзінде барлау жұмыстарына 707 лицензия, өндіруге 22 лицензия берілген.
Геологиялық барлау нәтижесінде алғаш рет мемлекеттік есепке бес кен орны енгізілді. Олар: Көк-Жон (Болаттөбе учаскесі), Алтын-Шоко, Самомбет, Студенттік және Тақыр-Қалжыр. Сонымен қатар пайдалы қазбалар қоры шамамен 98 тонна алтынға, 36 мың тонна мысқа, 11 млн тонна марганецке және 1,3 млн тоннадан астам фосфоритке артқан.
2026 жылға қарай геологиялық-геофизикалық зерттелуін 2,2 млн шаршы шақырымға жеткізу жұмыстары жүріп жатыр. Қазіргі таңда 2 млн 14 мың шаршы шақырым аумақ зерттелген, ал жыл соңына дейін бұл көрсеткіш 2 млн 38 мың шаршы шақырымға жетпек.
Вице-министрдің айтуынша, саланың келесі даму кезеңі геологиялық зерттеулерді 1:50 000 масштабқа көшірумен байланысты. Бұл перспективалы учаскелерді ерте анықтауға және барлау жұмыстарының тиімділігін арттыруға мүмкіндік береді. 2026–2028 жылдары 100 мың шаршы шақырым аумақты зерттеу жоспарланған, кейін жыл сайын шамамен 30 мың шаршы шақырым қамтылады.
Жобалар Ұлттық геологиялық қызмет, «Центргеолсъемка» кәсіпорны, Қ.И. Сәтбаев атындағы Геология институты және саланың жетекші мамандары қатысатын консорциум аясында жүзеге асырылады. Сонымен қатар жұмыстарға «Тау-Кен Самұрық» қатысып, аэрогеофизикалық, геохимиялық және сандық технологиялар қолданылмақ.
Дереккөз: Өнеркәсіп министрлігі