2025 жылдың қаңтар–қараша айларында Қазақстанда мал шаруашылығы саласы негізгі көрсеткіштер бойынша тұрақты өсімді сақтады. Ауыл шаруашылығы жануарларының саны да, өндірілген өнім көлемі де оң динамика көрсетті.
Есепті кезеңде ірі қара мал басы 2,7%-ға өсіп, 8,3 млн басқа жетті. Бұзау саны 2,8 млн болып, өткен жылдың сәйкес кезеңімен салыстырғанда 17,8%-ға артты. Жылқы саны 6,9%-ға ұлғайып, 4,4 млн басты құрады, ал құлын саны 1 млн-ға жетіп, 8,8% өсім тіркелді. Түйе шаруашылығында да оң өзгеріс байқалып, мал басы 6,3%-ға артып, 300 мыңға жетті, бота саны 53,8 мың болып, 5,9%-ға көбейді.
Ауыл шаруашылығы министрлігінің мәліметінше, құс саны 8,8%-ға өсіп, 48,5 млн басқа жеткен. Қой басы өткен жылғы деңгейде сақталып, 19,6 млн басты құрады. Бұл ретте қозы саны 7,7 млн болып, 5%-ға артты. Осы кезеңде ел бойынша еттің барлық түрінен 1 021,6 мың тонна өнім өндірілді.
«Бұл 2024 жылғы көрсеткіштен 3%-ға жоғары. Атап айтқанда, сиыр еті - 358,8 мың тонна (2024 жылы - 351,4 мың тонна), қой еті — 111,8 мың тонна (109,1 мың тонна), жылқы еті - 146,8 мың тонна (140 мың тонна), құс еті -337,1 мың тонна (326,3 мың тонна) және басқа да өнімдер өндірілді», делінген Ауыл шаруашылығы министрлігі таратқан хабарламада.
Мал шаруашылығының өзге бағыттары бойынша да өсім сақталды. Сүт өндірісі 3 491 мың тоннаға жетіп, бір жылда 5%-ға артты. Жұмыртқа өндіру көлемі 4 156,7 млн дана болып, өткен жылмен салыстырғанда 1,5% өсім көрсетті.
«Мал шаруашылығының жалпы өнімінің нақты көлем индексі 103,5%-ды құрады, ал өндірілген өнімнің ақшалай көлемі 3,3 трлн теңгеге жетті. Бұл тұрақты дамудың және ел экономикасына үлестің жарқын көрсеткіші», деді министрлікте.
Дереккөз: Ауыл шаруашылығы министрлігі