«Қазпошта» АҚ халықаралық YTO International логистикалық компаниясының, Qazpost-YTO бірлескен кәсіпорнының, «Сарыарқа» әуежайының және Қарағанды облысы әкімдігінің өкілдерімен жұмыс кездесуін өткізді. Іс-шара логистикалық инфрақұрылымды дамытуға және пошта-логистикалық қызметтер саласындағы ынтымақтастықты нығайтуға арналды.
Кездесу барысында Qazpost, YTO International және Qazpost-YTO бірлескен кәсіпорны тарифтік шешімдерді келісуді аяқтау, ішкі «соңғы миль» жеткізуін ұйымдастыру, сондай-ақ Алматы сұрыптау орталығындағы сұрыптау процесін көшірудің техникалық аспектілерін талқылады. Сонымен қатар Qazpost-YTO бірлескен кәсіпорны 2025 жылғы жұмыс қорытындыларын, стратегиялық пайымын, алдағы жылға арналған бизнес-жоспарын, Almaty Sky Hub-ты дамыту жоспарларын және халықаралық жүк тасымалы саласындағы бірлескен қызмет перспективаларын таныстырды.
Жиын барысында Қарағанды сұрыптау орталығының таныстырылымына және өңірлік логистикалық инфрақұрылымды кеңейту бағыттарына ерекше назар аударылды. Атап айтқанда, Cargo Hub Караганда құру, әуежай аумағында қоймалық және терминалдық инфрақұрылымды дамыту, сондай-ақ логистикалық процестерді оңтайландыру үшін цифрлық шешімдерді енгізу мәселелері қаралды.
Кездесудің қорытынды кезеңінде «Қазпошта» АҚ, YTO International, Қарағанды облысының әкімдігі және «Сарыарқа» әуежайы арасында өзара түсіністік пен ынтымақтастық туралы төртжақты меморандумға қол қойылды. Құжат тараптардың ұзақ мерзімді серіктестікті дамытуға, инфрақұрылымдық жобаларды бірлесіп іске асыруға және өңірдің транзиттік әлеуетін арттыруға ниетті екенін бекітті.
Қарағанды облысы әкімінің орынбасары Ермек Алпысовтың айтуынша, жобаны іске асыру үшін әуежайдың қосалқы аймағынан 4 гектар жер учаскесі бөлінген. Сондай-ақ Қарағанөзек станциясынан «Сарыарқа» әуежайына дейін ұзындығы 25 шақырым болатын теміржол тармағын салу бойынша жобалау-сметалық құжаттаманы әзірлеу жұмыстары басталған.
Дереккөз: QazPost