Алматыда жол-көлік оқиғаларының деректері, тұрғындардың өтініштері мен онлайн сауалнама нәтижелері негізінде жол қауіпсіздігі ең төмен саналатын учаскелер анықталды. Тізімге Горный Гигант, Құрамыс, Таугүл, Таугүл-1, Мамыр-1 шағынаудандары, сондай-ақ Бұқар жырау – Сәтбаев – Байтұрсынов – Есентай өзені және Әл-Фараби – Жароков – Дунаевский – Розыбакиев көшелерінің маңындағы кварталдар енді.
Талдау барысында ресми статистикамен қатар Sergek Group ұсынған жол қозғалысы мен жол-көлік оқиғалары бойынша деректер пайдаланылды.
Аталған алты учаскенің бірінде жол қауіпсіздігін арттыруға бағытталған тактикалық пилоттық жоба іске асырылады. Пилот аясында уақытша инфрақұрылымдық шешімдер енгізіліп, олардың әсері өзгерістерге дейінгі және кейінгі көрсеткіштер арқылы бағаланады. Нәтижелері оң болған жағдайда, бұл тәсілдер тұрақты шешімдер ретінде енгізілуі мүмкін.
Өзге учаскелер бойынша көлік қозғалысын қайта ұйымдастыру және қауіпсіздікті күшейту жөнінде ұсыныстар әзірленеді.
Зерттеу БҰҰ-Habitat жүзеге асырып жатқан «Building back safe, sustainable and resilient transport and urban mobility systems in Western Balkan and Central Asian landlocked developing regions» халықаралық жобасы аясында өтті. Алматы бұл бастамаға Кишинёв, Крагуевац, Вуштри және Бішкек қалаларымен бірге қатысуда.
«Gorozhanym» қорының жетекшісі, урбанист-зерттеуші Алеся Нугаева Open Almaty жүйесіне түскен 20 мыңнан астам өтініш талданып, тұрғындардың қауіпсіздікке қатысты көзқарасын анықтауға бағытталған сауалнама жүргізілгенін айтты. Оның сөзінше, өтініштердің басым бөлігі жол қауіпсіздігі мен балалардың қорғалуына қатысты.
Vision Zero Community өкілі әрі БҰҰ-Habitat ұлттық консультанты Ерканат Зайытов жол қауіпсіздігі инженерлік шешімдермен ғана шектелмейтінін атап өтті. Ал ІІМ Әкімшілік полиция комитетінің ресми өкілі Ақтоты Боранова пилоттық жобалар уақытша өзгерістердің тиімділігін бағалауға мүмкіндік беретінін жеткізді.
Жобаның ұлттық консультанты – Vision Zero Community, жергілікті серіктесі – Gorozhanym қоры. Бас серіктестер қатарында ҚР ІІМ, Алматы қаласы әкімдігі, Алматы қала дамыту орталығы және Sergek Group бар.
Жоба нәтижелері 2026 жылы Бакуде өтетін World Urban Forum 13 аясында ұсынылады.