Қарағанды облысында туризмді дамыту стратегиясы нақты екі аумаққа – Балқаш курорттық аймағы мен Қарқаралыға шоғырланды. Өңір билігі инфрақұрылымды жаңғырту арқылы туристік ағынды ұлғайтып, жеке инвестиция тартуды жеделдетуді мақсат етіп отыр. Бұл туралы облыс әкімі Ермағанбет Бөлекпаев айтты.
Балқаш қаласында жүргізіліп жатқан басты жобалардың бірі – әуежайды жаңғырту. Жоба аяқталғаннан кейін әуе айлағының өткізу қабілеті айтарлықтай артады.
«Келесі жылдан бастап ол (әуежай – ред) толыққанды жұмыс істеп, тәулігіне 8–9 әуе кемесін қабылдай алады. Қаланың жағалауын абаттандыру, жағажай аймақтарына инженерлік инфрақұрылым тарту қолға алынған. Барлық коммуникациялары дайын учаскелер бойынша жаңа демалыс аймақтарын салу үшін аукциондар өткізіліп жатыр», деді өңір басшысы.
Әуежай инфрақұрылымын күшейту Балқашты ішкі және сыртқы туризм үшін қолжетімді етудің негізгі факторына айналмақ. Сонымен қатар жағалау аумағын дамыту арқылы қалада маусымдық емес туризмді қалыптастыру көзделіп отыр.
Инженерлік инфрақұрылым ауылдық елді мекендерді де қамтиды. Торанғалық ауылына алғаш рет орталықтандырылған ауыз су жеткізу жоспарланған, сондай-ақ кәріз жүйесін салу жобасы қарастырылып жатыр. Бұл туристік қызмет көрсету сапасын арттырумен қатар, жергілікті тұрғындардың өмір сапасын жақсартуға бағытталған.
Қарқаралы бағытында да ірі инфрақұрылымдық өзгерістер басталған. Туризмді жыл бойы дамыту мақсатында «Бұғылы» демалыс аймағын абаттандыру көзделген. Аумағы 75 гектарды құрайтын бұл аймаққа электр желілері, ауыз су құбыры мен кәріз жүйесі тартылуда.
Көлік қолжетімділігі де назардан тыс қалмады. Биыл Қарағанды–Қарқаралы автожолы толық жөнделсе, келесі жылы Қарқаралы қаласының ішкі жолдарын жаңарту жоспарланып отыр. Өңір әкімдігінің мәліметінше, бұл шаралар туристер легін арттырумен қатар, бизнес үшін жаңа мүмкіндіктер ашады.