Қазақстанның Ұлттық экономика министрлігі «Алатау қаласының арнайы мәртебесі туралы» конституциялық заң жобасын қоғамдық талқылауға шығарды. Құжат Алатауды ерекше құқықтық және экономикалық режимі бар, дербес басқару мен инвестиция тарту жүйесі қалыптасқан жаңа буын қаласы ретінде дамытуға бағытталған.
Заң жобасын әзірлеу барысында халықаралық консалтингтік компаниялардың қатысуымен әлемдегі бірқатар табысты модельдер талданған. Атап айтқанда, Дубай, Шэньчжэнь, Инчхон, Рас-эль-Хекма секілді смарт-қалалар мен арнайы юрисдикциялардың тәжірибесі, сондай-ақ «Астана» халықаралық қаржы орталығының институционалдық үлгісі ескерілген.
Талдау қорытындысы бойынша технологияға бағдарланған, инвесторлар үшін түсінікті әрі бәсекеге қабілетті орта құруды көздейтін конституциялық құқықтық негіз ұсынылып отыр, деді Экономика министрлігінде. Құжатта қаланы басқарудың ерекше тәртібі, халықаралық құрылыс стандарттары мен техникалық регламенттерді қолдану, жоғары білікті шетелдік мамандарды тартудың жеделдетілген тетіктері қарастырылған.
Сонымен қатар салық салу мен бюджеттік қатынастың арнайы режимі, инвестицияларды қорғау және капитал қозғалысының ашық тәртібі енгізіледі. Инвестициялық жобаларға жер телімдерін беру рәсімі жеңілдетіліп, цифрлық активтердің айналымын құқықтық реттеу тетіктері бекітіледі.
Ұсынылып отырған модель Алатауды жеке институционалдық ортаға, қаржылық архитектурасы мен басқару жүйесі бөлек «дербес экожүйе» ретінде дамытуға мүмкіндік береді. Қаланы басқару Премьер-Министрдің төрағалығымен құрылатын Алатау қаласының кеңесіне жүктеледі, оның құрамына міндетті түрде тәуелсіз мүшелер мен халықаралық сарапшылар тартылады.
Айта кетейік, қаланың ұзақмерзімді дамуы нақты жоспарлау құжаттарымен айқындалады: 30 жылға арналған тұжырымдамалық жоспар және 15 жылдық даму стратегиясы мен қала құрылысы жоспары әзірленеді. Қаржылық модель де бөлек қарастырылған. 2050 жылға дейін Алатау бюджеттік өзін-өзі қамтамасыз ету деңгейіне жеткенге дейін оның салықтық және салықтық емес кірістері жоғары тұрған бюджетке алынбайды.
Инвесторлар үшін құқықтық тұрақтылықты қамтамасыз ету мақсатында қала өз нормативтік актілерін қабылдау және лицензиялау жүйесін енгізу құқығына ие болады. Бұдан бөлек, бизнеске арналған барлық мемлекеттік қызметтер «бірыңғай терезе» қағидаты бойынша толық цифрлық форматқа көшіріледі.
Конституциялық заң жобасы Алатау қаласының озық дамуын жеделдетуге бағытталған және қазіргі уақытта ашық қоғамдық талқылауға ұсынылып отыр.
Бұған дейін Алатау қаласының бюджеті үш есеге өсіп, 8,8 млрд теңгеге жеткені хабарланды. Қаланың 10 айдағы өнеркәсіптік өндіріс көлемі 17%-ға артып, 115,6 млрд теңгені құрады. Сондай-ақ қаладағы алғашқы 5G базалық станциясы іске қосылды. Жаңа станция желінің өткізу қабілетін арттырып, пайдаланушыларға жоғары жылдамдықты интернетке қол жеткізуге мүмкіндік береді.
Бұған қоса, Алматы облысы әлемдік технологиялық алып BOE-ді тартуда. Алатау қаласында LED-дисплей өндіретін зауыт ашылады.