Өтініш берген талапкерлер тест тапсыру күні мен уақытын, сондай-ақ өту орнын өздері таңдайды. ҰБТ кезінде калькулятор, химиялық элементтердің периодтық жүйесі және тұздардың ерігіштік кестесі қолжетімді болмақ. Тест аяқталған соң, қатысушылар 30 минут ішінде апелляцияға өтініш бере алады. Апелляция нәтижесі сертификатқа енгізіліп, талапкердің жеке кабинетінде шығады, деп хабарлады QazMonitor-ға ҚР Ғылым және жоғары білім министрлігінің баспасөз қызметі.
2026 жылғы ҰБТ форматы өзгеріссіз қалып отыр, яғни үш міндетті пән және екі бейіндік пән бойынша тест тапсырылады. Жалпы тапсырмалар саны – 120, оның ішінде «Қазақстан тарихы» – 20 тапсырма, «Оқу сауаттылығы» мен «Математикалық сауаттылық» – 10 тапсырмадан, бейіндік пәндер бойынша – әрқайсысынан 40 тапсырма. Ең жоғары ұпай – 140. Тестілеу уақыты – 4 сағат (240 минут), ерекше білім қажет ететін балаларға қосымша 40 минут қарастырылған.
Қаңтардағы ҰБТ-ға күндізгі оқу нысаны бойынша ақылы негізде жоғары оқу орындарына түсуге ниет білдіргендер, шығармашылық ББТ-дан басқа дайындық бағыттарына ауысқысы келетіндер, педагогикалық бағытқа өтетіндер, өткен жылғы түлектер, шетелде білім алған Қазақстан азаматтары, сондай-ақ шетелдік ұлт өкілдері қатыса алады.