Энергетика министрлігі отын-энергетика кешенінде жасанды интеллект технологияларын енгізудің келесі кезеңіне көшуді жоспарлап отыр. Негізгі басымдық – тәжірибелік эксперименттерден өндірістік ауқымда қолдануға өту болады.
Ведомствоның мәліметінше, ЖИ саласындағы жобалар инфрақұрылымның тұрақтылығын арттыруға, апат тәуекелдерін төмендетуге және операциялық шығындарды қысқартуға бағытталған қолданбалы шешімдерге негізделген. Министрлік үшін технологиялық тиімділік пен өндірістік сенімділік негізгі өлшем ретінде алынған.
Қазіргі уақытта энергетика саласында үш практикалық цифрлық шешім сынақтан өтіп жатыр. Соның бірі – ұшқышсыз ұшу аппараттарын пайдалана отырып электр желілерін интеллектуалды диагностикадан өткізу. Компьютерлік көру мен машиналық оқыту алгоритмдері 4K-камералар, жылу датчиктері және лидарлар арқылы жиналған деректерді талдап, тірек конструкцияларындағы ақауларды, сымдардың қызып кетуін және жасырын деформацияларды автоматты түрде анықтайды.
Екінші бағыт – жылу желілерін роботтандырылған құбырішілік диагностикадан өткізу. Акустикалық резонанс технологиясына негізделген бұл шешім құбырларды ашпай-ақ және жүйені тоқтатпай-ақ олардың нақты жай-күйін бағалауға мүмкіндік береді. Бұл тәсіл жөндеу жұмыстарын алдын ала жоспарлауға жағдай жасайды.
Үшінші шешім газ саласына қатысты. Арнайы ЖИ-ассистент мобильді қосымша арқылы газ есептегіштердің көрсеткіштерін автоматты түрде таниды. Бұл деректерді енгізудегі адам факторын азайтып, есепке алу дәлдігін арттыруға бағытталған.
Министрлік атап өткендей, пилоттық жобалардың алғашқы нәтижелері оң деп бағаланады: диагностика мерзімі қысқарды, техникалық ақауларды ерте анықтау мүмкіндігі артты, ал ресурстарды пайдалану тиімділігі өсті. Бұл факторлар апаттылық деңгейін төмендетуге тікелей әсер етіп отыр.
Президент қойған міндеттерге сәйкес, 2026 жылы Энергетика министрлігі электр және жылумен жабдықтау салаларында жасанды интеллект шешімдерін кеңінен енгізуге кірісуді көздеп отыр. Басым бағыттардың қатарында дефектоскопия жүйелеріндегі ақаулар классификаторын кеңейту, магистральдық құбыржолдарға интеллектуалды диагностика енгізу және газ саласындағы цифрлық сервистерді дамыту бар.
Сонымен бірге, Энергетика министрлігі жасанды интеллект бағытында жұмыс істейтін отандық IT-компаниялармен серіктестікті жалғастырады. Тиісті меморандумдар технологиялық шешімдерді жергілікті ерекшеліктерге бейімдеуге және ұлттық цифрлық құзыреттілікті күшейтуге бағытталған.