2026 жылы ҰБТ форматы өзгеріссіз қалады. Қатысушылар үш міндетті пән мен таңдауы бойынша екі бейіндік пәнді тапсырады. Жалпы тапсырмалар саны – 120: «Қазақстан тарихы» бойынша 20, «Оқу сауаттылығы» мен «Математикалық сауаттылық» бойынша 10 тапсырмадан, әр бейіндік пәннен 40 тапсырма. Ең жоғары балл – 140, деп хабарлады QazMonitor-ға ҚР Ғылым және жоғары білім министрлігінің баспасөз қызметі.
Тестілеу уақыты – 4 сағат (240 минут). Ерекше білім беру қажеттіліктері бар балаларға қосымша 40 минут беріледі.
Қаңтардағы ҰБТ-ға ақылы негізде күндізгі оқу нысаны бойынша жоғары оқу орындарына қабылданғандар, шығармашылық ББТ-дан ақылы дайындық бағыттарына ауысқысы келетіндер, педагогикалық бағыттағы студенттер, өткен жылғы мектеп және колледж түлектері, шетелде білім алған ҚР азаматтары және басқа шартты топтар қатыса алады.
Айта кетейік, қаңтар айында басталған 2026 жылғы Ұлттық бірыңғай тестілеу (ҰБТ) 10 ақпанға дейін жалғасады. Биыл тестілеуге 187 мыңға жуық адам өтініш берді, бұл өткен жылмен салыстырғанда 20 мыңға көп. Қатысушылардың 75,2%-ы қазақ тілінде, 24,6%-ы орыс тілінде, 189 адам ағылшын тілінде тест тапсырады.