Елімізде сумен жабдықтау және су бұру жүйелерін жаңғырту аясында су арналарын цифрландыру жұмыстары күшейтілмек. Үкімет отырысында өнеркәсіп және құрылыс вице-министрі Қуандық Қажкенов цифрландыру коммуналдық инфрақұрылымды тиімді басқарудың, бақылаудың және шығындарды азайтудың негізгі тетігі екенін атап өтті, деп хабарлайды QazMonitor.
Оның айтуынша, осы мақсатта су тұтыну көрсеткіштерін байланыс арналары арқылы автоматты түрде жинауға мүмкіндік беретін телеметрия технологиясы бар автоматтандыру жүйелері мен есепке алу аспаптарына қойылатын талаптарды стандарттау жұмыстары жүргізілуде. Ұлттық жоба аясында су арнасы кәсіпорындарының негізгі процестерін кезең-кезеңімен автоматтандыру көзделген.
2026-2028 жылдар аралығында еліміз бойынша 3,6 млн-нан астам «ақылды» су есептеу құрылғыларын орнату жоспарланып отыр.
Халықаралық тәжірибені зерттеу және енгізу мақсатында өткен жылы Veolia, Suez және Aqualia секілді ірі халықаралық операторлармен ынтымақтастық туралы меморандумдарға қол қойылды. Қазіргі уақытта су инфрақұрылымын басқару саласында бірқатар азиялық компаниялармен келіссөздер жалғасуда.