Энергетика министрлігі желтоқсан айында Каспий құбыр консорциумының (КҚК) теңіз терминалы арқылы мұнай жөнелту көлемінің уақытша төмендегенін растады, деп хабарлайды QazMonitor.
Ведомствоның мәліметінше, бұл жағдай ұшқышсыз ұшу аппараттарының шабуылы салдарынан ВПУ-3 айлақ құрылғысының мәжбүрлі түрде тоқтатылуына, сондай-ақ Қара теңіз акваториясындағы қолайсыз метеорологиялық жағдайға байланысты орын алған.
Өндіріс пен экспорттағы іркілістерге жол бермеу үшін министрлік мұнай экспортын ұйымдастыру бойынша жедел шаралар қабылдады. Объективті факторлардың салаға ықпалын барынша азайту мақсатында экспорттық ағындар баламалы тасымалдау бағыттарына қайта бөлінді.
Атап айтқанда, Атырау–Самара бағыты бойынша мұнай тасымалдау көлемінің артқаны және Қытай Халық Республикасына жеткізілімдердің ұлғайғаны тіркелді. Ал өзге экспорттық бағыттар бойынша тасымалдау жоспарлы орташа деңгейде сақталды.
Қазіргі уақытта жағдай уәкілетті органның тұрақты бақылауында.