Темір жолда қауіпсіздікті арттыру мақсатында Talgo пойыздарына кезең-кезеңімен бейнебақылау жүйесі енгізілуде. Қазіргі таңда 630 вагонда 1 350 камера, ал 19 бағыттағы вагон-ресторандар мен барларда қосымша 92 камера орнатылған. Бейнежазбалар жағдайлық орталыққа жіберіліп, мамандар барлық стандарттан тыс жағдайларды талдайды, деп хабарлайды QazMonitor.
«Жолаушылар тасымалы» АҚ мәліметінше, Қазақстан заңнамасына сәйкес қауіпті немесе тыйым салынған заттарды тасымалдауға әрекет жасау қылмыстық жауапкершілікке әкеп соғуы мүмкін.
Тыйым салынған заттар қатарына жарылғыш құрылғылар мен жарылғыш заттар, пиротехника, радиоактивті және есірткі заттары, жанғыш сұйықтықтар мен материалдар, соның ішінде бензин, метанол және метил эфирі, сондай-ақ жанғыш қатты заттар жатады. Сонымен қатар улы, күшті әсер ететін және уландырғыш заттарды, инфекциялық және биологиялық қауіпті материалдарды тасымалдауға болмайды.
Сондай-ақ пойыздарда барлық түрдегі атыс қаруын, оның ішінде травматикалық және газ қаруын, суық және соққы-соқпалы қаруларды – қылыш, шашка, қанжар, кастет және осыған ұқсас заттарды алып жүруге тыйым салынған. Оқ-дәрілерді, атап айтқанда әскери, травматикалық, аңшылық патрондарды тасымалдауға да рұқсат етілмейді.
Сапар алдында барлық жолаушылар вокзалдарда міндетті тексеруден өтеді. Ірі теміржол станцияларында рентген-телевизиялық қондырғылар, стационарлық және қолдық металлодетекторлар орнатылған, бейнебақылау, күзет және дабыл жүйелері жұмыс істейді. Қауіпсіздік тәулік бойы полиция қызметкерлері мен күзет қызметі арқылы қамтамасыз етіледі.