Бүгін ҚР Парламенті Мәжілісінде депутат Үнзила Шапақ Премьер-министрдің орынбасары – ЖИ және цифрлық даму министрі Жаслан Мәдиевке Roblox платформасына қатысты депутаттық сауал жолдады, деп хабарлайды QazMonitor.
«2025 жылғы ашық дереккөздерге сүйенсек, Roblox платформасының күнделікті белсенді пайдаланушыларының саны шамамен 150 млн адамды құрайды. Аудиторияның негізгі бөлігі - балалар мен жасөспірімдер. Халықаралық сарапшылар тарапынан Roblox ойынының балалар психикасына тигізуі мүмкін теріс әсері туралы алаңдаушылық білдірілуде. Атап айтқанда, виртуалды тәуелділік, агрессивті мінез-құлық, шынайы өмірден алшақтау, сондай-ақ жас ерекшелігіне сәйкес келмейтін контентпен кездесу қауіптері атап өтіледі», деді Үнзила Шапақ.
Оның айтуынша, Roblox сияқты ашық онлайн-платформаларда педофилдер мен алаяқтардың белсенді түрде болатыны туралы ақпарат бар. Депутат бұл платформаның Түркия, Катар, Ресей, Қытай, Иран, Солтүстік Корея және бірқатар басқа елдерде бұғатталғанын айтып өтті.