Астанадағы №9 «Зерде» мамандандырылған лицейінің 11-сынып оқушысы Ермұхамед Түктібай әлемнің жетекші жоғары оқу орындарынан бірден бірнеше шақырту алды. Жас талапкер оқу ақысы мен тұру шығындарын толық өтейтін халықаралық білім гранттарына ие болды, деп хабарлайды QazMonitor елорда әкімдігінің ресми сайтына сілтеме жасап.
Ол QS әлемдік рейтингінде жоғары орын алатын The University of Hong Kong (HKU) университетіне «Машина жасау» мамандығы бойынша қабылданды. Сонымен қатар, The Hong Kong Polytechnic University мен City University of Hong Kong университеттері Ермұхамедке толық қаржыландырылатын грант ұсынған. Мұндай ұсыныстар халықаралық практикада сирек кездеседі және талапкердің академиялық деңгейінің жоғары екенін көрсетеді.
Ермұхамед халықаралық емтихандардан да үздік нәтиже көрсеткен. Ол SAT тестінен 1540 балл (математикадан – 790 балл), ал IELTS емтиханынан 8.0 балл жинаған.
Болашақ инженер ғылыми-зерттеу жұмыстарына да белсенді қатысады. Ол SolidWorks бағдарламасында тісті берілістерді жобалап, 3D-баспа арқылы дайындап, түрлі полимер материалдардың тозу деңгейіне тәжірибелік сынақтар жүргізген.
Сонымен қатар, Ермұхамед математика мен өнерді ұштастырған жобаларымен де ерекшеленеді. Ол суретші М.К. Эшердің жұмыстарын визуалды-математикалық тұрғыда талдап, «мүмкін емес фигура» ретінде танымал Пенроуз үшбұрышының физикалық моделін құрастырған.