Қазақстандық ғалымдар электр энергиясын жинақтауға арналған құрылғыларда қолданылуы мүмкін жаңа буындағы MXene наноматериалдарын зерттеуде. Бұл материалдар жоғары электрөткізгіштігімен ерекшеленіп, энергия сақтау технологияларының тиімділігін арттыруға мүмкіндік береді, деп хабарлайды QazMonitor.
Зерттеу жұмыстарын Satbayev University ғалымдары жүргізіп жатыр. Мамандар MXene материалдарын алудың жаңа тәсілдерін сынақтан өткізіп, оларды кремний мен белсендірілген көмір арқылы модификациялау әдістерін зерттеген.
Ғылыми жұмыс барысында алынған композиттік материалдардың электрохимиялық сипаттамалары талданып, олардың тиімділігі салыстырмалы түрде бағаланған. Нәтижесінде әзірленген материалдың дәстүрлі белсендірілген көмірмен салыстырғанда меншікті сыйымдылығы жоғары екені анықталды.
Жоба жетекшісі, PhD Қалижан Шәкеновтің айтуынша, зерттеу нәтижелері энергияны сақтауға арналған электрохимиялық құрылғылардың тиімділігін арттыруға жаңа мүмкіндіктер ашады.
Ғалымдар жоба аясында материалдың эксперименттік үлгісін жасап, оны зертханалық сынақтардан өткізді. Ғылыми зерттеуге университеттің магистранттары мен докторанттары да қатысып жатыр.
Қазіргі уақытта жоба бағдарламалық қаржыландыру аясында жүзеге асырылуда. Келесі кезеңде зерттеушілер кең ауқымды сынақтар жүргізіп, технологияны практикалық қолдануға енгізу мүмкіндігін қарастыруды жоспарлап отыр.