Азия Олимпиадалық кеңесі 2029 жылғы Қысқы Азия ойындарын өткізу орны ретінде Алматы қаласын таңдады. Бұл туралы Синьхуа агенттігі хабарлады.
Ойындарды өткізу туралы келісімге ағымдағы жылдың 5 ақпанында Миланда қол қою жоспарланған.
Алматы бұған дейін 2011 жылы (Астанамен бірлесіп) Қысқы Азияданы және 2017 жылы Қысқы Универсиаданы жоғары деңгейде өткізген болатын.
Еске салсақ, Қытайдың Харбин қаласында өткен 2025 жылғы Азия ойындарында отандық спортшылар айтарлықтай нәтиже көрсетті. Қазақстан құрамасы 4 алтын, 9 күміс және 7 қола медальмен жалпыкомандалық есепте 4-ші орынға тұрақтаған болатын.