Астанада орналасқан Beeline Arena Ұлттық теннис орталығы Халықаралық теннис федерациясының (ITF) жоғары деңгейдегі Gold Level Recognition мәртебесіне ие болды, деп хабарлайды QazMonitor Қазақстан теннис федерациясына сілтеме жасап.
Аталған сертификат спорттық инфрақұрылымның, жаттығу базасының және спортшыларды даярлау жүйесінің халықаралық ең жоғары стандарттарға сәйкес келетінін растайды. Осылайша Қазақстан ресми түрде әлемдік теннис инфрақұрылымы дамыған елдердің элиталық тобына енді.
Бұған дейін мұндай «алтын» мойындауға тек Франция, АҚШ, Ұлыбритания, Нидерланды, Канада және Швейцария ие болған.
Федерация мәліметінше, 2017 жылдан бері Қазақстанда 39 теннис орталығы салынып, жалпы саны 394 корт пайдалануға берілген. Олардың қатарында hard және clay жабындысы бар халықаралық стандарттағы алаңдар жұмыс істейді. Осы кезеңде салаға тартылған жеке инвестиция көлемі 200 млн доллардан асқан.
ITF берген «алтын мәртебе» төрт жыл мерзімге — 2030 жылға дейін жарамды. Сонымен қатар федерация барлық ресми коммуникацияларда ITF Gold белгісін пайдалану құқығына ие болды.
Орталықтың жұмысы тек техникалық талаптар бойынша ғана емес, спорттағы адалдық стандарттары тұрғысынан да жоғары бағаланған. International Tennis Integrity Agency қазақстандық орталықты National Training Centre Integrity Standards Award сыйлығымен марапаттады. Ұйым басшысы Карен Мурхаус Қазақстанда спортшыларды дамыту үшін ашық әрі әділ ойын қағидаттарына негізделген жүйе қалыптасқанын атап өтті.