Астанада спорттық нысандарды жаңғыртуға және арнайы секциялар желісін кеңейтуге жүйелі түрде инвестиция салынып келеді. Қалада қысқы спорт түрлеріне арналған бірыңғай мектеп құру туралы шешім қабылданған. Жаңа құрылым бірнеше спорттық бағытты бір басқару жүйесіне біріктіріп, спортшыларды бастапқы дайындықтан ұлттық құрама деңгейіне дейін тиімді дайындауға мүмкіндік береді.
Бұл мектеп қысқы спорт түрлері бойынша бірыңғай дайындық орталығын қалыптастыру; кадрлық, қаржылық және материалдық ресурстарды шоғырландыруды көздейді. Сондай-ақ оқу-жаттығу үдерісінің сапасын және спортшылардың бәсекеге қабілеттілігін арттыру; мекемелер құрылымын қысқы олимпиадалық спорт түрлерін дамыту басымдықтарына сәйкестендірмек.
«Жыл соңына дейін Орталық саябақта жаңа заманға сай шаңғы базасының құрылысы аяқталады. Жаңа кешенде түрлі деңгейдегі шаңғыроллерлік жолдар, киім ауыстыратын жылы бөлмелер, инвентарь дайындау бөлмелері, жаттықтырушылар мен әдіскерлерге арналған арнайы кабинеттер болады. Бұдан бөлек, «Қазақстан» спорт сарайының құрылысы да басталды, бұл қысқы спортпен айналысуға қолжетімді ортаны кеңейтудегі маңызды қадам болмақ», делінген ақпаратта.
Айта кетерлігік, енгізіліп жатқан өзгерістер кадрлық қысқартуға әкелмейді: барлық жаттықтырушы өз жұмыс орындарын сақтап, балалармен толық режимде жұмысын жалғастыра береді. Оқу-жаттығу процесі де бұрынғы көлемде жүргізіледі.
«Ата-аналар үшін алаңдауға еш негіз жоқ: жаттығу жағдайы нашарламайды, кесте мен бағдарламалар қолжетімді күйінде қалады. Қысқы спорт түрлерін бір мектепке біріктіру жас спортшылардың дайындық сапасын арттыруға мүмкіндік береді», деп қосты әкімдікте.
Дереккөз: Астана әкімдігі