Үкімет Щучье мен Бурабай көлдеріндегі туристердің жүктемесін басқа су айдындарына бөлуді жоспарлап отыр. Бұл туралы бүгін Үкімет отырысында Туризм және спорт министрі Ербол Мырзабосынов мәлімдеді, деп хабарлайды QazMonitor.
Оның сөзінше, биылдан бастап Бурабайда бір көлге тәуелділік азаяды. Щучинск–Бурабай курорттық аймағын дамытудың кешенді жоспары аясында Щучье мен Бурабай көлдеріне түсіп отырған шамадан тыс жүктемені Қатаркөл, Кіші және Үлкен Шабақты, Жөкей көлдеріне бөлу жоспарланып отыр. Бұл – экологиялық қысымды төмендетумен қатар, туристік инфрақұрылымды кеңістіктік тұрғыда әртараптандыруға бағытталған шешім.
Кешенді жоспарды іске асыру шеңберінде былтыр Бурабай кентінде променад аймағы, 10 километрге созылған велажол салынды. 8 жаңа қарау алаңы, 4 автотұрақ пайдалануға берілген. Сонымен қатар Щучье көліндегі қоғамдық жағажай абаттандырылды, қосымша 15 дәретхана орнатылды, экскурсиялық тікұшақ туры іске қосылды.
«Жалпы алғанда кешенді жоспарды іске асыру арқылы 2029 жылдың соңына дейін шетелден келетін туристерді 94 мың адамға дейін, туризм саласында жұмыс істейтіндерді 32,5 мың адамға дейін көбейтуге болады», деді министр.
Сондай-ақ Ербол Мырзабосынов Маңғыстауды ұзақмерзімді демалыс аймағына айналдыру көзделіп отырғанын айтты. Онда жағажай, Кендірлі, Бозжыра, Тамшалы және ерекше табиғи объектілерде жаяу жүргіншілер жолы, қарау алаңдары, визит орталықтары жасалады.
«Туристік өнімді жақсартудың нәтижесінде туристердің осы аймақта болу уақыты 7-10 күнге дейін ұзарады деген ойдамыз. Демек, келушілерден түсетін кіріс те айтарлықтай көбейеді. Жалпы алғанда кешенді жоспарды іске асыру арқылы 2029 жылға қарай қонақүй инфрақұрылымын кеңейтуге және туристердің санын тағы 150 мыңға көбейтуге болады», деді ол
Бұған қоса, ведомство басшысы саланы дамыту тұжырымдамасын өзектендіру басталғанын хабарлады. Министрлік әзірлеген жаңа іс-қимыл жоспары 100-ден астам тармақтан тұрады. Құжатқа орталық мемлекеттік органдардың, әкімдіктердің және «Атамекен» ҰКП өкілдерінің ұсыныстары енгізілген.
Сонымен қатар Қазақстанға турист тартуға арналған жаңа маркетинг стратегиясын іске қосу жоспарланып отыр. Оның сөзінше, жалпы болжамға сәйкес, 2029 жылға қарай ішкі туристер саны 11 млн адамға дейін, ал туризм саласында жұмыспен қамтылғандар 800 мың адамға жетуі мүмкін.