Қарағанды облысында байланыс желілерін жаңғырту, халық көп жиналатын демалыс орындарындағы қауіпсіздік шараларын күшейту және жол бойындағы сервисті дамыту жұмыстары жалғасуда. Бұл туралы облыстық әкімдіктің баспасөз қызметі хабарлады.
Балқаш қаласында Жұмысшы кентіндегі, қаланың өнеркәсіптік және оңтүстік-шығыс бөліктеріндегі, сондай-ақ жағалау аймақтарындағы базалық станциялар жаңғыртылды. Шиліауыз шағынауданында жаңа станция салынды.
Шұбартүбекте елді мекенге кіреберісте жаңа станция салынды. Tele2 компаниясымен бірлесіп тағы бір станция орнатылды. Ол іске қосылғаннан кейін елді мекеннің шығыс бөлігін байланыспен қамтамасыз етеді. Торанғалықта екі жаңа станция дайын, тағы екі қолданыстағы станция жаңғыртылды.
Жұмыстар елді мекендермен ғана шектелмей, автомобиль жолдарының бойында да жүргізілуде. Ақбастау ауылының маңында антенна-діңгекті станция салынды. Beeline компаниясы оны қазан айының соңына дейін пайдалануға беруді жоспарлап отыр. Келесі жылы Балқаш бағытындағы трасса бойындағы байланыс қамту аймағын тағы алты учаскеде кеңейту жоспарланған.
Қарқаралыда Tele2 компаниясы «Каскад» демалыс аймағының аумағына базалық станция орнатты. Сондай-ақ «Шахтер», «Жемчужина» және «Берлога» демалыс аймақтарының маңындағы қолданыстағы станциялар жаңғыртылды.
2027 жылы қалада тағы бір базалық станция орнатып, бес демалыс аймағын байланыспен қамтамасыз ететін үш антенна-діңгекті станция салу жоспарланып отыр.
Туристердің қауіпсіздігіне де ерекше көңіл бөлінуде. Жазғы маусымда Балқаш жағалауында және Қарқаралы ұлттық паркінің аумағында полиция күшейтілген режимде қызмет атқарды. Балқашта туристік полицияның қосымша 25 қызметкері және Полиция департаментінің тағы 20 қызметкері кезекшілікке шықты. Қарқаралы ауданында туристік полицияның бес қызметкері жұмылдырылды.
Қауіпсіздікті бақылау жүйесі де технологиялық тұрғыдан жетілдірілуде. Балқаш жағалауындағы 33 бейнекамера Жедел басқару орталығына қосылды, ал Қарқаралы ауданында 72 камера пайдалануға берілді. Шұбартүбек пен Торанғалықта екі стационарлық полиция бекеті тәулік бойы жұмыс істейді.
Жол бойындағы сервис те дамып келеді. Бүгінде облыстың республикалық маңызы бар трассаларында жол бойындағы сервистің 106 нысаны жұмыс істейді. Жалпы өңірдің республикалық маңызы бар жолдарында 55 демалыс алаңы бар.