«Ауыл аманаты» жобасы ауыл тұрғындарының табысын арттыруға, кәсіпкерлікті дамытуға және ауылдық аумақтарда жаңа жұмыс орындарын құруға мүмкіндік беріп отыр. Осы бағдарлама аясында Ұлан ауданының Тоғанас ауылында жаңа туристік демалыс аймағы салынуда, деп хабарлайды Шығыс Қазақстан облысының әкімдігі.
Жобаның қатысушысы, жергілікті кәсіпкер Меруерт Бауыржанқызының айтуынша, бүгінде демалыс үйлерінің құрылысы аяқталу сатысында. Барлық құрылыс жұмыстары белгіленген мерзімде жүргізіліп жатыр.
«Бұл жоба мен үшін үлкен мүмкіндік болды. Өз ауылымда туризм саласын дамытуды армандадым. Қазіргі таңда демалыс үйлерінің құрылысы соңғы кезеңінде. Алдағы уақытта бұл жерге жыл он екі ай бойы келушілерге қызмет көрсететін заманауи демалыс аймағы ашылады», – дейді кәсіпкер.
Жаңа демалыс аймағы табиғаты әсем өңірде орналасқан. Мұнда демалушылар үшін барлық қолайлы жағдайлар жасалмақ: жайлы қонақ үйлер мен жылыжай үлгісіндегі демалыс үйлері, – балаларға арналған ойын алаңы, отбасылық демалыс аймақтары, табиғи таза тағамдар ұсынатын асхана мен жазғы шатырлы орындар бар.
Демалыс орны тек жаз мезгілінде ғана емес, жылдың төрт мезгілінде де жұмыс істейтін болады. Қыста қонақтар атқа міну және табиғат аясында демалу, көктем мен күзде экотуризм бағытындағы шаралар ұйымдастырылмақ.
Бұл бастама ауыл тұрғындары үшін жаңа жұмыс орындарын ашуға, сондай-ақ ауыл экономикасын дамытуға жол ашады.
«Ауыл аманаты» жобасы – ауыл кәсіпкерлері үшін нақты мүмкіндік. Осындай жобалар арқылы ауылда өмір сапасын арттырып, туризм мен шағын бизнесті дамытамыз», – дейді Меруерт Бауыржанқызы.
Жаңа туристік нысанның ашылуы Тоғанас ауылының дамуына тың серпін беріп, өңірдің ішкі туризм әлеуетін арттыруға үлес қосатыны сөзсіз.