Қонаев қаласында еліміздегі ең үлкен мұз айдыны жұмысын бастады. Ол 22 100 шаршы метр аумақты алып жатыр.
Алматы облысы әкімдігінің мәліметінше, аймақтағы қысқы туризм ерекше сипатқа ие болмақ.
«Алматы облысында - Орталық Азиядағы ең үлкен мұз айдыны ашылады.Аумағы 22 100 шаршы метр мұз айдыны Қонаев қаласынан орын тепкен. Ашық аспан астындағы мұз айдынында ырғақ пен қозғалыс үйлесім тауып, қысқы маусымды белсенді өткізетіндер үшін таптырмас орынға айналары сөзсіз», делінген ақпаратта.
Сонымен қатар әкімдік таулы аймақтарды тамашалауды қалайтындарға Oi-Qaragai құшағын ашуға дайын екенін еске салды.
«Теңіз деңгейінен 2140 метр биіктіктегі бұл курорт қар жамылған шыңдарымен, көкжиекке ұласқан аумағы жаныңды баурайды. Бұл да Орталық Азиядағы ең ұзын тау шаңғысы трассасы деп саналады. Алматы облысының туристік бейнесін айшықтайтын бұл мекендер, бірі — энергия мен эмоцияға толы, екіншісі — табиғатпен үндескен тыныштық мекені. Бұл жерлерге келген жан тек демалып қайтпайды, ол жаңа әсер, жаңа тыныс, жаңа шабытпен оралады», деп қосты әкімдікте.
Дереккөз: Алматы облысы әкімдігі