Бенилюкс елдері Маңғыстауға назар аударып, жаңа туристік бағыттарды қарастыруда. Нидерланд пен Бельгияның танымал басылымдары Қазақстанды шетелдік аудиторияға тартымды туристік бағыт ретінде таныстырды. Материалдар Маңғыстау облысының экспедициялық әлеуеті мен бірегей табиғи ландшафттарына арналды.
Нидерланд корольдігінің Travel Book журналы Маңғыстау облысы мен Астанаға жеке материал арнады. Қызылқұп шатқалының пейзаждары журналдың жаңа шығарылымында негізгі визуалдық басымдыққа айналды. Мақалада Бозжыра, Торыш және Қызылқұп шатқалдарының таңғажайып көріністері ерекше аталады. Басылым Нидерланд пен Бельгияда таратылады.
Журнал авторы өзінің саяхат тәжірибесін былай сипаттайды: «Маңғыстауды көбіне Марспен немесе Аймен салыстырады және себепсіз емес. Мұндағы пейзаждар мүмкін емес көрінеді. Бұл ешнәрсемен салыстыруға келмейтін ландшафттар және олардың дәл ортасында тұрғанда бір ғана сөз айта аласың: вау. Ең әсерлі орындар – Бозжыра, Қызылқұп және Торыш. Бозжыра алқабында бәрі ақ: шатқалдар, тау шыңдары, таңғажайып пішіндегі жартастар. «Тирамису таулары» деп аталатын Қызылқұп шатқалы қызғылт, қызыл және терракота реңктерімен ерекшеленеді. Ал ең таңғажайып жер – «Шарлар алқабы» (Торыш), онда мыңдаған мінсіз дөңгелек тастар бар».
Бельгиялық Papillio лайфстайл-басылымы да Маңғыстау облысын сирек кездесетін ландшафттары бар туристік бағыт ретінде таныстырды. Журналдың таралымы шамамен 280 000 дана және ол Қазақстанның табиғи бірегейлігін шетелдік оқырмандарға жеткізеді.
Сонымен қатар, өңір туралы визуалды ақпарат She Is Not Lost халықаралық платформасында жарияланды. Бұл қауымдастық нәзік жанды саяхатшыларды біріктіреді және Маңғыстаудың бірегей ландшафттарын әлемге паш етеді.
Дереккөз: Kazakh Tourism