Іс-шарада цифрландыру мен креативті индустрияның дамуы жағдайында ұлттық мәдени кодты сақтау мәселелері талқыланды, деп хабарлайды QazMonitor.
Семинарда тарих ғылымдарының докторы Жамбыл Артықбаев, суретші-дизайнер, «Қазақ оюлары» кітабының авторы Ерлан Қожабаев және дизайнер Фарида Мерхамитқызы баяндама жасады. Сарапшылар қазақ мәдениетіне тән емес элементтердің «дәстүр» ретінде насихатталып жүргеніне алаңдаушылық білдірді.
Ұлттық ою-өрнектерді орынсыз қолдану, әйелдерге тән мотивтердің ерлер киімінде жиі пайдаланылуы, сондай-ақ қазақ мәдениетіне жат элементтердің ұлттық мұра ретінде ұсынылуы сынға алынды. Сонымен бірге әлеуметтік желілер арқылы таралған, тарихи негізі жоқ «жаңа дәстүрлердің» қоғамға әсері талқыланды.
Мамандар мұндай үрдістер қалыптасқан құндылықтар мен мәдени нормаларды бұрмалап, түпкілікті салт-дәстүрлердің мәнін әлсірететінін атап өтті. Семинар барысында дәстүрлерді коммерциялау мәселесі де көтерілді.
Іс-шараға ғалымдар, этнографтар, мәдениеттанушылар, креативті индустрия өкілдері, қоғам және мемлекет қайраткерлері, жастар мен волонтерлік ұйымдар, сондай-ақ БАҚ пен медиа-сарапшылар қатысты.