Астанада Қазақстандағы алғашқы TUMO Astana креативті технологиялар орталығы іске қосылады. Жоба 12–18 жас аралығындағы жасөспірімдерге жасанды интеллект пен цифрлық технологияларды тегін, әрі іріктеу мен емтихансыз меңгеруге мүмкіндік береді.
TUMO Astana - Аlem.ai халықаралық жасанды интеллект орталығының базасында орналасады. Ол әлемнің ондаған елінде жұмыс істеп тұрған TUMO жаһандық желісінің бір бөлігіне айналады. Халықаралық тәжірибеде TUMO форматы бейресми технологиялық білім берудің ең тиімді модельдерінің бірі ретінде танылған.
Орталықта жасөспірімдер 11 бағыт бойынша білім алады. Бағдарлама генеративті жасанды интеллект, бағдарламалау, робототехника, 3D-модельдеу, веб-әзірлеу, ойын индустриясы, графикалық дизайн, анимация, киноөндіріс, цифрлық музыка және моушн-графиканы қамтиды.
Жобаны Alem.ai Foundation қоры жүзеге асырады. Қор Astana Hub-тың еншілес ұйымы ретінде Қазақстанда жасанды интеллект пен цифрлық технологиялар саласында креативті кадрлардың жаңа буынын қалыптастыруды көздейді.
«Біз елорда жасөспірімдеріне іріктеу мен емтихансыз өз дағдыларын шыңдауға болатын алаң ұсынғымыз келеді. Ол үшін технологияға деген сүйіспеншілік пен қызығушылық болса жеткілікті. TUMO тәжірибе жасауға, қателесуге, жаңа дүниелерді жасауға және дара жолды табуға мүмкіндік береді», – деді Alem.ai Foundation қорының бас директоры Адина Маратқызы.
Оқыту офлайн форматта, тәжірибеге сүйеніп ұйымдастырылады. Қатысушылар нақты жобалармен жұмыс істейді, оқу қарқынын өздігінше айқындап, тәлімгерлердің қолдауына ие болады. Бұл модельдің тиімділігі Dalberg консалтингтік компаниясының халықаралық зерттеуі де дәлелдеген.
TUMO моделінің басты ерекшелігі – қатысушылардың жеке оқу траекториясы. Жасөспірімдер оқу қарқынын өздері белгілейді, нақты жобалармен жұмыс істейді және тәлімгерлердің қолдауына сүйенеді. Бұл тәсілдің тиімділігі Dalberg консалтингтік компаниясының халықаралық зерттеуімен расталған.
Техникалық біліммен қатар, бағдарлама командалық жұмыс, коммуникация, бастамашылдық, эмпатия және уақытты басқару секілді әмбебап дағдыларды дамытуға бағытталған. Оқыту процесі TUMO Path жүйесі арқылы ұйымдастырылып, әр елден тартылған сарапшылар өткізетін воркшоптар мен зертханалық сабақтарды қамтиды.
Айта кетейік, TUMO Astana-ға қабылдау ашық форматта жүргізіледі. Бағдарлама технологиямен алғаш танысып жүрген оқушыларға да, өз дағдыларын жүйелеп, жеке цифрлық портфолио қалыптастыруды мақсат еткен жасөспірімдерге де арналған.