Алатау қаласын дамыту аясында жалпы құны шамамен 1,8 трлн теңгені құрайтын 44 инвестициялық жобаға басымдық берілді. Бұл туралы Премьер-министр Олжас Бектеновтің төрағалығымен өткен Алатау қаласын дамыту жөніндегі кеңесте айтылды, деп хабарлайды QazMonitor.
Ұсынылған деректерге сәйкес, инвестициялық портфель өнеркәсіп, логистика, агроөңдеу, қызмет көрсету және креативті индустрия салаларын қамтиды. Жобаларды іске асыру нәтижесінде 30 мыңнан астам жаңа жұмыс орны құрылып, Alatau City-де тұрақты экономикалық экожүйе қалыптастыру көзделіп отыр.
Үкімет деңгейінде Алатау қаласы ұзақмерзімді экономикалық өсімнің жаңа орталығы ретінде қарастырылып отыр. Осыған байланысты инвесторлар үшін тартымды институционалдық орта қалыптастырумен қатар, қала экономикасына серпін беретін жүйе құраушы жобаларды іске асыруға басымдық берілуде.
Негізгі зәкірлік жобалардың қатарында Iconic Complex көпфункционалды кешенін салу және KAIST Kazakhstan технологиялық университетін құру жоспарланған. Бұл жобалар Алатаудың сәулеттік-іскерлік өзегін қалыптастырып, жоғары білікті кадрлар мен инновацияларды тартуға бағытталған.
Сонымен қатар инженерлік және көлік инфрақұрылымын дамыту бойынша кешенді жұмыстар жүргізіліп жатыр. Энергиямен, сумен және газбен қамтамасыз ету, сондай-ақ жол желісін дамыту жобалары кезең-кезеңімен іске асырылып жатыр.